Uiraa a te feia taio

E nehenehe anei te mau hauti roro uira haavî uˈana e haafifi i te taairaa i rotopu i te hoê taata e o Iehova?

“Te hiˈopoa maira Iehova iho i te taata parau-tia e te taata ino atoa, area o te hinaaro i te haavîraa uˈana, e riri roa mau â ta ˈNa aau ia ˈna,” ta Davida arii o Iseraela i tahito ïa i papai. (Salamo 11:5, MN) E nehenehe te taˈo Hebera i hurihia ei “riri roa” e faataa i te riroraa “ei enemi.” No reira, te faariro ra te hoê taata mea au na ˈna te haavîraa uˈana ia ˈna iho ei enemi no te Atua. Teie ïa te uiraa ta tatou e mea tia ia hiˈopoa: E nehenehe anei te hoê taata e hauti ra i te tahi mau hauti roro uira e au i te haavîraa uˈana?

Te arue ra te mau hauti roro uira haavî uˈana i te faaohiparaa o te mau mauhaa tamaˈi. E pinepine te reira i te faaineine i te feia hauti i roto i te ohipa o te tamaˈi. Ua parau te vea The Economist e: “Mea tiaturi roa na te nuu Marite i te mau hauti roro uira ei mauhaa faaineineraa. E hauti hoo-ohie-hia te tahi mau hauti ta te nuu e faaohipa nei.”

Parau mau, aita te feia e hauti ra i te mau hauti roro uira haavî uˈana e haamauiui ra i te feia mau. Eaha râ ta te faaanaanataeraa ta ratou i maiti e faaite ra no nia i te tupu ra i roto i to ratou aau? (Mataio 5:21, 22; Luka 6:45) Eaha ta outou e faaoti no nia i te hoê taata o te au i te patia i te tipi, pupuhi, rave ino, e te taparahi pohe i te mau taata e ere i te mea mau? Eaha ïa mai te peu e e rave rahi hora i te hebedoma to tera taata haamâharaa i tera mau moemoeâ haavî uˈana a fatata ˈi i te maamaahia i taua mau hauti ra? Noa ˈtu e eita outou e horoa i te hoê faaotiraa ino roa, e manaˈo outou e mea au na ˈna te haavîraa uˈana, mai te hoê taata e mataitai i te hohoˈa faufau, te atuatu ra ïa i te hinaaro morare ore.—Mataio 5:27-29.

Eaha te rahi o to Iehova riri i te taata mea au na ˈna te haavîraa uˈana? Ua parau Davida e “e riri roa mau â” Iehova ia ˈna. I to Noa tau, ua faaite Iehova i te rahi o to ˈna riri i te feia o te au i te haavîraa uˈana. Ua parau Iehova ia Noa: “Ua fatata roa te hopea o te taata atoa ra ia ˈu; ua î hoi te fenua i te parau-tia ore [aore ra haavîraa uˈana] ia ratou: e inaha, te rave nei au e haamou ia ratou e te fenua atoa nei.” (Genese 6:13) Ua haamou te Atua mau i te huitaata i te hoê ao taata taatoa no to ratou haerea haavî uˈana. Ua faaora noa oia ia Noa e to ˈna utuafare—e vau taata o tei ore i au i te haavîraa uˈana.—Petero 2, 2:5.

“E tiapai” te feia o te hinaaro i te riro ei hoa no Iehova “i ta ratou ˈoˈe ei auri arote.” Eita ratou e haapii i te au i te haavîraa uˈana, eita hoi ratou “e haapii faahou i te tamaˈi.” (Isaia 2:4) No te riro noa ei hoa no te Atua eiaha râ to ˈna enemi, e mea tia ‘ia haapae tatou i te ino e ia rave i te maitai.’ E mea tia ia ‘imi tatou i te hau e ia aruaru atu i te reira.’—Petero 1, 3:11.

E nafea ïa mai te peu e ua hauti aˈena tatou i te mau hauti video haavî uˈana? E mea titauhia ia faaoti papu tatou i te faaoaoa ia Iehova ma te faaea i te rave i te mau mea ta ˈna e riri. Papu maitai, e mea tia ia pure tatou i te tauturu a te varua moˈa o te Atua no te faaore i tera peu atâta i te pae varua. E nehenehe tatou e faaore mai te peu e e vaiiho tatou i taua mau huru maitatai ra mai te hau, te maitai, e te hitahita ore ia ohipa ma te paieti i nia i to tatou oraraa.—Luka 11:13; Galatia 5:22, 23.