E “nehenehe te haapiiraa a te Atua” i te haerea maitai

I TE mea e e mea himene maitai te potii apî ra o Maria, no te oire o Kransnoyarsk, i Rusia, ua tuu ta ˈna orometua haapii ia ˈna i roto i te hoê fare haapiiraa himene. I muri iti noa ˈˈe, ma te faatura, ua haafatata ˈtu Maria i te hoê o ta ˈna mau orometua haapii no te faataa ˈtu e eita o ˈna e nehenehe e himene i te tahi mau himene. No te aha? No te mea e patoi te himeneraa i te mau himene faaroo i ta ˈna mau tiaturiraa niuhia i nia i te Bibilia. Ma te maere roa, ua ui te orometua haapii, ‘Eaha te vahi hape ia arue i te Atua na roto i te hoê himene?’

No te faaite no te aha o ˈna e ore ai e himene i te hoê himene no nia i te hoê atua toru tahi, ua iriti Maria i ta ˈna Bibilia e ua faataa oia e e ere te Atua e o Iesu Mesia hoê Atua, e te varua moˈa, o te puai ohipa ïa o te Atua. (Mataio 26:39; Ioane 14:28; Ohipa 4:31) Te faatia ra Maria e: “Aita to ˈu mau taairaa e ta ˈu orometua haapii i taui noa ˈˈe. Hau atu â, e mau orometua haapii maitai roa ta matou i te fare haapiiraa. Te hinaaro nei ratou ia faaite matou i to matou huru mau.”

I te roaraa o te matahiti haapiiraa, ua noaa ia Maria, no to ˈna huru, te faatura o ta ˈna mau orometua haapii e o to ˈna mau hoa haapiiraa atoa. Te parau ra Maria e: “Ua tauturu mai te mau faaueraa tumu bibilia ia ˈu i roto i to ˈu oraraa. I te hopea o te matahiti haapiiraa, ua fanaˈo vau i te hoê tapao maitai no te haerea tia e te nahonaho, area râ to ˈu na metua, ua fanaˈo ïa i te hoê rata mana haamauruururaa a te fare haapiiraa no te horoaraa i te hoê aratairaa maitai i ta raua tamahine.”

Ua bapetizohia Maria i te 18 no Atete 2001. Te parau ra oia e: “Te oaoa nei au e te nehenehe ra vau e tavini i tera Atua faahiahia mai ia Iehova!” Te faatupu ra te feia apî Ite no Iehova na te ao atoa nei i te mau parau o te Tito 2:10 (MN) i reira tatou e taio ai: “Ia nehenehe te [haapiiraa] a te Atua a to tatou [Faaora] i te mau mea atoa ra.”

[Hohoˈa i te api 32]

Rata haamauruururaa e parau tuite o te manuïaraa

[Hohoˈa i te api 32]

Maria e to ˈna na metua i muri aˈe i to ˈna bapetizoraa