Te mau aroraa na roto i te mau parau—no te aha e mea ino ai?

“Nohea te tamaˈi e te mârô i roto ia outou na?”—IAKOBO 4:1.

AITA te taata papai Bibilia ra o Iakobo e ui tia ˈtura i te mau faehau a te nuu no Roma, e aro ra no te haru i te mau fenua; aita atoa oia e faahapa ˈtura i te mau manaˈo turai o te pǔpǔ taata aro ati Iuda parauhia te mau Sicaires, aore ra Feia taparahi taata, o te senekele matamua T.T. Te manaˈo ra Iakobo i te mau aroraa e tupu ra i rotopu e piti aˈe taata. No te aha? No te mea mai te mau tamaˈi, e vavahi te mau aroraa i rotopu i te taata. A tapao na i teie mau aamu bibilia.

Ua feii roa ino te mau tamaiti a te patereareha ra o Iakoba i to ratou taeae ia Iosepha a hoo roa ˈtu ai ratou ia ˈna ei tîtî. (Genese 37:4-28) I muri aˈe, ua tamata te arii o Iseraela ra o Saula i te haapohe ia Davida. No te aha? No te mea ua feii oia ia Davida. (Samuela 1, 18:7-11; 23:14, 15) I te senekele matamua, ua haafifi e piti vahine Kerisetiano, o Euodia e o Sunetuhe, i te hau o te hoê amuiraa taatoa no ta raua mârôraa parau.—Philipi 4:2.

Aita i maoro aˈenei, e faatitiaifaro na te mau taata i to ratou mau peapea i roto i te mau aroraa e parauhia duel ma te faaohipa i te ˈoˈe aore ra te pupuhi. E pinepine te hoê o na taata aro e piti i te pohe aore ra i te riro ei huma e tae roa i te hopea o to ˈna oraraa. I teie mahana, e taotia pinepine te feia o te tatamaˈi noa i ta ratou mau mauhaa tamaˈi i nia i te mau parau mauiui, te mau parau patiatia. Noa ˈtu e eita paha te toto e manii, e haapepe te mau aroraa parau vaha i te mau huru aau e te roo. E pinepine te feia hapa ore i te mauiui i roto i tera mau “tamaˈi.”

A hiˈo na i te ohipa i tupu tau matahiti i teie nei i to te hoê perepitero Anglican pariraa i te tahi atu perepitero i te faaohiparaa ma te tano ore i te faufaa a te ekalesia. Ua atutu to raua peapea, e ua amahamaha te pǔpǔ ta raua i haapao na. Aita vetahi mau melo i hinaaro e haere i te pureraa mai te peu e na te perepitero ta ratou e patoi ra e peretiteni. No to ratou inoino rahi, ua ape noa ratou ia ratou iho i te fare pure. I to te perepitero i pari atu pariraahia i te peu taatiraa tia ore, ua rahi atu â te mârôraa.

Ua titau te arii epikopo no Cantorbéry i na perepitero e piti, ma te parau e “e mariri ai taata” ta raua tatamaˈiraa e “e peapea rahi o tei faaino i te iˈoa o to Tatou Fatu.” I 1997 ua farii hoê o na perepitero ia faatuhaahia oia. Ua faaea noa te tahi atu i nia i to ˈna tiaraa e tae roa ˈtu i te taime a raea ˈi ia ˈna te matahiti faatuhaaraa faahepohia. Ua tamau noa râ oia e tae roa i te taime hopea, faaea ˈtura i te 70raa o to ˈna matahiti, i te 7 no Atete 2001. Ua faahiti te hoê vea (The Church of England Newspaper) e te mahana a faatuhaahia ˈi o ˈna, e mahana oroa ïa no Victrice “peata.” O vai o Victrice “peata?” O te hoê epikopo ïa no te senekele 4 o tei papaihia paha no to ˈna patoiraa i te tamaˈi i roto i te hoê nuu. Ma te tapao i te taa-ê-raa o te haerea, ua faahiti te vea e: “Te oreraa e aro i roto i te hoê tamaˈi ekalesiatiko, e ere ïa i te huru o [te perepitero i faatuhaahia].”

Ua nehenehe hoi teie nau perepitero e ape i te faaino ia raua iho e ia vetahi ê ahiri raua i faaohipa i te aˈoraa i roto i te Roma 12:17, 18: “Eiaha roa te ino e tahoohia i te ino i te taata atoa nei. E haamanaˈo na i te mea maitai i te aro o te taata atoa nei. Peneiaˈe o te tia ra, e parahi hau noa outou i roto i te taata atoa nei.”

E o outou? Ia faainoino te hoê taata ia outou, e turai anei te inoino ia outou ia tatamaˈi? Aore ra e ape anei outou i te mau parau o te haamauiui e e vai ineine noa anei outou i te faahau? Ia faainoino outou i te hoê taata, e ape anei outou ia ˈna ma te tiaturi e a mairi ai te tau e moe ia ˈna te fifi? Aore ra e oioi anei outou i te tatarahapa? Ia tatarahapa outou aore ra ia faaore outou i te hapa a vetahi ê, e maitai atu â ïa outou i te tutavaraa i te faatupu i te hau. E nehenehe te aˈoraa bibilia e tauturu ia tatou ia faatitiaifaro i te mau peapea tahito atoa, mai ta te tumu parau i muri nei e faaite.