“Eaha ta oe ravea no te manuïa?”

UA HITIMAHUTA o Muriel, metua vahine e toru tamarii, i teie uiraa a te hoê taata paari matau ore i te hoê vahi amuraa maa oti noa. Ua ohipa noa na o Muriel i to ˈna afairaa i ta ˈna mau tamarii i ǒ te taote, e ua maorohia oia. Aita to ratou e taime rahi no te hoˈi i te fare e no te tamaa hou e haere ai i ta ratou putuputuraa Kerisetiano. No reira oia i afai ai i te mau tamarii i te hoê fare tamaaraa fatata ia nehenehe ratou e amu i te tahi maa.

A paia ˈi ratou, ua haafatata maira te hoê taata ia Muriel e ua parau maira e: “Ua hiˈo noa na vau ia outou mai to outou â tomoraa mai. E ua tapao vau i te hoê taa-ê-raa rahi i rotopu i ta oe mau tamarii e ta ˈu e farerei noa nei. E ite oe i te huru raveraa a te tamarii i te mau amuraa maa e te mau parahiraa. E tuu ratou i to ratou avae i nia i te amuraa maa. E turaihia te mau parahiraa ma te haapao ore. Area râ ta oe mau tamarii, mea hauti ore ïa e te haerea nehenehe. Eaha ta oe ravea no te manuïa?”

Ua pahono maira o Muriel: “E haapii tamau ta ˈu tane e o vau iho nei i te Bibilia e ta mâua mau tamarii, e e tutava matou i te faaohipa i te mea ta matou e haapii ra i roto i to matou oraraa. E Ite no Iehova matou.” Ua parau maira te taata e: “E ati Iuda vau tei ora mai i te Taparahiraa a te mau Nazis. Te haamanaˈo ra vau e ua ite au i te mau Ite no Iehova i te hamani-ino-raahia i Heremani. I reira atoa, e mea taa ê roa ratou. Ua putapû mau vau i te haerea o ta oe mau tamarii. E mea tia ia hiˈopoa maitai au i ta oe haapaoraa.”

E buka aratai maitai roa te Bibilia no te aupuru i te tamarii. E mea anaanatae roa na te mau Ite no Iehova i te tautururaa ia vetahi ê ia fanaˈo i te aratairaa e vai ra i roto i te mau Papai. Te titau manihini nei matou ia outou ma te mahanahana ia farii i teie aniraa.