Te taime tamaaraa—E ere i te hoê taime no te tamaa noa!
MEA au na te taata atoa i te hoê maa mea au ia amu. Mai te peu e, i te roaraa o te tamaaraa, e nehenehe atoa outou e fanaˈo i te aparauraa maitai e te auhoaraa mahanahana e te feia ta outou e here ra, e riro taua taime ra ei tupuraa oaoa mau o te haamâha eiaha noa i to tatou poia. E rave rahi utuafare o te faariro i te amuiraa i te hoê aˈe taime i te mahana no te tamaa ei peu matauhia. E horoa te taime tamaaraa i te hoê utuafare i te ravea no te tauaparau i te mau tupuraa e opuaraa o te mahana. E ite rii te mau metua e faaroo ra i te tatararaa e faatiaraa a ta ratou mau tamarii i to ratou manaˈo e huru aau. A mairi ai te tau, e patu te mau taairaa oaoa e te hau, tei fanaˈohia i te taime tamaaraa i roto i te hoê utuafare, i te panaˈonaˈo ore, te tiaturiraa, e te here o te haapaari atu â i te aueue-ore-raa o te fetii.
I teie mahana, no te mea e rave rahi melo o te utuafare e ohipa noa nei, e mea fifi no ratou ia amui no te tamaa. I te tahi mau vahi o te ao nei, eita te peu tumu e farii ia tamaa amui te hoê utuafare aore ra ia aparau atoa i te roaraa o te taime tamaaraa. Ua matau te tahi atu mau utuafare i te pata i te afata teata i te roaraa o te tamaaraa, papu maitai ïa e e faaere te reira ia ratou i te mau aparauraa au maitai atoa.
Tera râ, e vai ara noa te mau metua Kerisetiano i te mau ravea no te patu i to ratou utuafare. (Maseli 24:27) E mea maoro aˈenei, ua parauhia i te mau metua e te ravea maitai roa ˈˈe no te haapii i te parau a te Atua i ta ratou mau tamarii o te taime ïa e ‘parahi noa ˈi ratou i roto i te fare.’ (Deuteronomi 6:7) E pûpû mai te parahi-amui-raa ma te tamau no te hoê tamaaraa i te mau metua i te hoê fanaˈoraa otahi no te haamau i roto i ta ratou mau tamarii i te here hohonu ia Iehova e ta ˈna mau faaueraa tumu parau-tia. Na roto i te atuaturaa i te hoê huru oaoa e te hau, e nehenehe outou e faariro i te taime tamaaraa ei tupuraa au mau e te patu i to outou atoa utuafare. Oia, te taime tamaaraa e ere i te hoê taime no te tamaa noa!