Te mihi ra anei outou i te hoê ao aita e mǎtaˈu faahou?

“Te ora nei tatou i roto i te hoê ‘tupuraa peapea rahi tamau o te vai-ara-raa e . . . te ravea ore,’ faatupuhia e te hoê ‘ati . . . tei ore i faataa-maitai-hia o te nehenehe e tupu i te mau taime atoa i roto i te mau huru atoa ma te faaara ore.’”

TE FAATAA ra teie mau parau, no roto mai i te vea Newsweek o te matahiti i mairi aˈenei, i te huru aau o te taata e rave rahi e ora nei i roto i te ao arepurepu o teie mahana. Ua faataa Iesu Mesia e e rahi roa ˈtu â taua huru aau ra i te tau no a muri aˈe e fatata maira. Ua tohu oia i te hoê tau ahoaho i rotopu i te mau nunaa e eita ratou e ite i te ravea e e tarapape te aau o te mau taata no te mǎtaˈu e te manaˈoraa i taua mau mea ra e fatata i te tupu i nia i te fenua nei. Eita râ tatou e mǎtaˈu aore ra e manaˈo e aita e ravea, i te mea e ua parau faahou Iesu e: “Ua tupu anaˈe teie nei mau mea, e nânâ i to outou mata i nia, e faateitei i to outou upoo, te fatata maira hoi to outou ora.”—Luka 21:25-28.

Ma te faataa i te mau tupuraa o to ˈna nunaa i te fenua nei i muri aˈe i tera faaoraraa, ua parau te Atua ra o Iehova e: “E parahi . . . to ˈu ra mau taata i roto i te fare mau e te peapea ore, e tia i roto i te parahiraa ora, e te vahi hauti-ore-hia mai.” (Isaia 32:18) Ua parau Iehova na roto i ta ˈna peropheta Mika e: “E parahi . . . ratou o te taata atoa i raro aˈe i ta ˈna iho vine, e i raro aˈe i ta ˈna iho suke, e aore roa e taata e haamǎtaˈu mai ia ratou.”—Mika 4:4.

Auê ïa taa-ê-raa e te oraraa i teie mahana! Aita e ati matau-ore-hia e haamǎtaˈu i te huitaata. Aita e tupuraa peapea tamau o te vai-ara-raa e te ravea ore, e tupuraa hopea ore râ o te hau e te oaoa.