E nafea ia faaruru i te toaruaruraa

TE TOARUARU ra anei outou? I teie tau papu ore e te peapea, e rave rahi taata te toaruaru ra. Te toaruaru ra te tahi pae no te ohipa ore. Te faaruru nei te tahi atu i te mau faahopearaa o te hoê ati. Te faaû atoa ra te tahi atu i te mau fifi utuafare, te maˈi ino mau aore ra te manaˈo moemoe.

Mai te peu e te toaruaru ra outou, ihea outou e nehenehe ai e imi i te tauturu? E mau mirioni taata na te ao nei tei tamahanahanahia maoti te taioraa i te Parau a te Atua, te Bibilia. Ua tamǎrûhia ratou na roto i te mau parau a te aposetolo Paulo, o tei na ô e: “Ia haamaitaihia te Atua, te Metua o to tatou Fatu ra o Iesu Mesia, te tumu o te aroha e o te Atua no ˈna anaˈe te mahanahana; o tei haamahanahana mai ia matou i to matou mau pohe atoa nei.” (Korinetia 2, 1:3, 4) No te aha e ore ai e taio i teie irava e te tahi atu i roto i ta outou iho Bibilia? Ia na reira outou, e ‘haamahanahanahia to outou aau, e e haapapuhia outou.’—Tesalonia 2, 2:17.

E nehenehe atoa outou e tauturuhia ia faaruru i te toaruaruraa na roto i te amuimuiraa i te feia e tavini nei ia Iehova. Te parau nei te Maseli 12:25 e: “E oto tei te aau o te taata ra, e piˈo ïa i raro; hoê roa râ parau maitai ra, oaoa aˈera ïa.” Ia apiti tatou i te mau putuputuraa Kerisetiano, e faaroo tatou i tera “parau maitai,” e mea ‘momona i te taata nei, e mea ora hoi no te ivi.’ (Maseli 16:24) No te aha e ore ai e apiti i te hoê putuputuraa i te Piha a te Basileia a te mau Ite no Iehova ia ite outou iho e nafea tera haaputuputuraa e haamahanahana ˈi ia outou?

E nehenehe atoa outou e fanaˈo i te mana o te pure. Mai te peu e te teimaha ra outou i te ahoaho o te oraraa, a faaite i to outou mau huru aau hohonu roa ˈˈe i “tei faaroo i te pure ra.” (Salamo 65:2) Mea taa aˈe i to tatou Atua Poiete ra o Iehova to tatou huru ia tatou iho. E nehenehe tatou e tiaturi i ta ˈna tauturu. Te fafau maira ta ˈna Parau e: “E tuu oe i ta oe hopoia ia Iehova ra, e na ˈna oe e tauturu mai; e ore roa oia e vaiiho noa ˈtu i te taata parau-tia ia faaaueuehia.” (Salamo 55:22) Oia, “te feia . . . e tiaturi ia Iehova, e noaa ïa te etaeta apî.”—Isaia 40:31.

Ua horoa mai te Atua ra o Iehova na tatou i te mau faanahoraa faahiahia o te nehenehe e tauturu ia tatou ia faaruru i te toaruaruraa. E faaohipa anei outou i te reira?