“E hinaaro mâua e parau, ‘E!’”

AITA i maoro aˈenei, ua tae mai ta te amaa a te mau Ite no Iehova i Nigeria te hoê rata, e te faahiti ra te tahi tuhaa i te mau parau i muri nei:

“Ua pohe ta mâua tamaiti, Anderson, i te 14raa o to ˈna matahiti. Hou a pohe ai, ua faaamu oia e piti moa. Ua hinaaro oia e hoo i te reira e hapono atu ai i te moni i te amaa ei ô no te turu i te ohipa pororaa na te ao atoa. Ua pohe râ oia na mua ˈˈe a hoohia ˈi te reira.

“Ei faatupuraa i to ˈna hinaaro, ua faaamu mâua, to ˈna na metua, i na moa e ua hoo atu. Te hapono atu nei mâua i te moni ei ô na Anderson. No te parau fafau a Iehova, te tiaturi nei mâua e e fatata—fatata roa—mâua i te ite faahou ia Anderson. E hinaaro mâua e parau, ‘E!’ ia ui mai oia mai te peu e ua faatupu mâua i ta to ˈna mafatu i hinaaro. No reira, te tiai ru nei mâua i te ite eiaha ia Anderson anaˈe, oia atoa râ i te hoê ‘nahoa rahi ite’ o te faatia-faahou-hia mai.”—Hebera 12:1; Ioane 5:28, 29.

Mai tei faataa-papu-hia i roto i te rata i nia nei, ua riro te tiaturiraa i te tia-faahou-raa ei turu papu no te mau Kerisetiano mau. E oaoa rahi mau â te mau mirioni utuafare, mai to Anderson utuafare, ia farii faahou mai ratou i te feia herehia ta ratou i ere i roto i te enemi ra te pohe!—Korinetia 1, 15:24-26.

Te pûpû nei te Parau a te Atua i teie tiaturiraa tamahanahana o te tia-faahou-raa mai te hoê o te mea faahiahia e rave rahi e fatata i te tupu i roto i te ao apî parau-tia i raro aˈe i to te Atua Basileia. (Petero 2, 3:13) Ma te faahiti i ta te Atua e rave no te taata i taua tau ra, te parau ra te Bibilia e: “E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:4.