Te hoê rata na Noa

“E NOA here e, e rave rahi taime to ˈu taioraa i te Bibilia no nia ia oe e mea nafea to oe paturaa i te araka i reira oe e to oe utuafare te faaoraraahia i te diluvi.”

Teie te omuaraa o te hoê rata ta te hoê tamahine 15 matahiti, o Minnamaria te iˈoa, i papai i te hoê tataˈuraa papai a te mau piahi mai te 14 e tae atu i te 21 matahiti. Na te fare rata no Filelane, te taatiraa orometua haapii i te reo Filelane tumu e te totaiete papai Filelane i faatupu i te tataˈuraa. E titauhia ia papai te feia tataˈu i te hoê rata niuhia i nia i te hoê buka. E nehenehe te reira e faataehia i te taata papai buka aore ra i te taata faahitihia i roto i te buka. Ua maiti te mau orometua haapii 1 400 tiahapa rata a ta ratou mau piahi e ua hopoi atu i te tomite o te tataˈuraa. I muri iho, ua faautua maitai te tomite i te rata maitai roa ˈˈe i te re matamua, hoê ahuru i te re piti, e hoê ahuru i te re toru. Ua oaoa o Minnamaria i te mea e to roto ta ˈna rata i te anairaa toru.

No te aha o Minnamaria, te hoê piahi apî, i papai ai i te hoê rata na Noa, te hoê taata tei ora tau 5 000 matahiti aˈenei? Te parau ra oia e: “Te Bibilia te ohipa matamua ta ˈu i manaˈo. Ua matau maitai au i te mau taata faahitihia i roto i te Bibilia. E rave rahi ta ˈu i taio no nia ia ratou e e au ra e mea ora ratou no ˈu. O Noa ta ˈu i maiti no te mea e oraraa anaanatae mau to ˈna e mea taa ê i to ˈu.”

Te faaoti ra te rata a Minnamaria na Noa ma te mau parau e: “E hiˈoraa noâ oe no te faaroo e te auraro. Te faaitoito nei to oe oraraa i te feia atoa e taio nei i te Bibilia ia ohipa ia au i to ratou faaroo.”

Te faaite maitai ra teie rata a teie taata apî taio Bibilia e “e mea ora . . . e te puai rahi” mau te Bibilia i nia i te taata, te taurearea e te ruhiruhia.—Hebera 4:12.