Ravea no te hoê oraraa maoro e te oaoa

“E HINAARO te taata atoa e ora noa; aita râ hoê aˈe e hinaaro e ruau.” Tei matauhia ïa i te parau. Te tiai ru ra te taata e rave rahi e fatata ra i te faatuhaaraa ia rahi atu â te taime e ia iti te hopoia. Teie râ, te taiâ ra ratou i te riro ei feia ohipa ore e te faufaa ore. Te haapeapea atoa ra ratou no nia i te moemoe, te oaoa ore, e te ea e ino noa ˈtura.

Eaha ïa te ravea o te hoê oraraa oaoa? E tauturu te mau hoa maitatai e te hoê utuafare î i te here ia oaoa te feia apî e te ruhiruhia atoa. E ere râ o te mea ta vetahi ê e rave no te haamaitai i te oraraa o te hoê taata ruhiruhia i te mea faufaa roa ˈˈe. O ta te hoê taata ruhiruhia e nehenehe e rave no vetahi ê te mea faufaa ˈtu â.

Ua faaite te hoê maimiraa maoro i nia e 423 feia faaipoipo ruhiruhia e “e nehenehe te tururaa i te oraraa o te tahi atu mau taata e faaroa ˈtu â i to tatou iho oraraa.” Te faataa ra Stephanie Brown, o tei aratai i te maimiraa, e: “Te horoa ra teie mau itearaa i te manaˈo e e ere o ta tatou e fanaˈo na roto i to tatou mau taairaa e vetahi ê te mea faufaa roa; o ta tatou râ e horoa.” Te vai ra i roto i teie horoaraa te tautururaa ia vetahi ê e rave i te ohipa fare, te haapaoraa i te mau tamarii, te hoohooraa mai i te mau mea, te faurao, aore ra te faarooraa i te taata e hinaaro ra e paraparau.

Fatata e 2 000 matahiti aˈenei, ua parau Iesu Mesia e: “E mea maitai i te horoa ˈtu i te rave mai.” (Ohipa 20:35) E ere o te moni rahi aore ra te mau ravea no te faaroa i te oraraa e te haapaoraa i te maa te ravea no te hoê oraraa maoro e te oaoa. O te ohipa-tamau-raa râ e te horoaraa i te taime, te itoito, e te puai no te haamaitai i te oraraa o vetahi ê.

Teie râ, eita te reira e navai no te faaore i te matahiti rahi, te maˈi e te pohe. O te Basileia o te Atua anaˈe te faaore i tera mau mea. I raro aˈe i ta ˈna faatereraa, e mou te maˈi e ‘e ore roa atoa te pohe.’ (Apokalupo 21:3, 4; Isaia 33:24) Oia mau, e ora te mau taata auraro e a muri noa ˈtu i roto i te oaoa i nia i te hoê fenua paradaiso. (Luka 23:43) E oaoa te mau Ite no Iehova i te horoa na vetahi ê i teie ravea bibilia no te hoê oraraa maoro e te oaoa.