Maoti te tauturu a te Bibilia, ua patoi o ˈna i te faahemaraa

Mea rahi te faahemaraa i roto i te ao i teie mahana. E ere i te mea ohie ia faaohipa i te mau ture aveia bibilia. Ei hiˈoraa, e tautooraa paha ia pee i te aˈoraa bibilia: “E maue ê atu i te faaturi.”—Korinetia 1, 6:18.

Ua rave na te hoê Ite no Iehova, o ta tatou e mairi i te iˈoa o Sebastian, i te ohipa na te hoê taiete no Scandinavie i Poronia. Ua aro puai oia no te tapea i to ˈna taiva ore.

Ua matauhia o Sebastian ei Ite no Iehova. No te mauruuru o to ˈna mau paoti i to ˈna itoito e to ˈna huru maitai, ua fanaˈo oia i te mau haamaitairaa rau. Ua itehia râ e i roto i tera mau haamaitairaa te vai atoa ra te mau apooraa ohipa o tei taaihia i te mau faaanaanataeraa morare ore.

Aita i maoro, ua haamata o Sebastian i te feaa. “Ua ite to ˈu paoti e e Ite no Iehova vau. No reira o ˈna e tiaturi ai ia ˈu. Mai te peu e eita vau e apiti, e tihatihia vau, e mea fifi roa ia noaa mai te hoê ohipa. E mai te peu e e mataitai noa vau?”

I muri iho, ua taa ˈtu â ia Sebastian i tei hinaarohia ia rave o ˈna. Oia hoi, e faanaho oia e ia apee te mau vahine taiata i te mau hoani no te ara mai i te po. E nafea oia?

Ua faaoti o Sebastian e haamanaˈo i te paoti i to ˈna huru niuhia i nia i te Bibilia i mua i te morare ore. Aita i maoro, ua papu atura e eita te reira e tano ia Sebastian e e faarue iho â o ˈna i ta ˈna ohipa. Ua itea mai ia ˈna te hoê ohipa apî tei raro mai te moni aita râ taua faahemaraa ra. I teie nei, e manaˈo haava mâ to ˈna.

Eaha ta outou e rave ia faahepo te hoê taata ia outou ia rave aore ra ia tapo i te mata i nia i te morare ore? E ineine anei outou i te taui roa? O ta Iosepha ïa i rave i te tau bibilia, mai tei faahitihia i roto i te Genese 39:7-12.