E mea tia anei ia tiaoro tatou i te mau melahi ia tauturu mai?

E MEA tano anei ia tiaoro i te mau melahi i te mau taime ahoaho? O te manaˈo ïa o te taata e rave rahi. Inaha, te parau ra te New Catholic Encyclopedia e: “Te pure ra te tahi . . . i te mau melahi . . . teie râ, i te auraa anaˈe e e nehenehe ta ratou e paraparau i te Atua no tatou.” E mea tia anei ia tiaoro tatou i te mau melahi ia paraparau no tatou?

Te horoa ra te Parau a te Atua i te iˈoa o na melahi haapao maitai a te Atua e piti noa, o Mihaela e o Gaberiela. (Daniela 8:16; 12:1; Luka 1:26; Iuda 9) I te mea e ua faahitihia teie na iˈoa i roto i te Bibilia, e haroaroa tatou e e ihotaata varua otahi te melahi taitahi ma te hoê iˈoa, e ere i te tahi noa puai ihotaata ore. Tera râ, aita te tahi atu mau melahi i faaite i to ratou iˈoa. Ei hiˈoraa, ia Iakoba i ani i te iˈoa o te melahi tei farerei ia ˈna, aita oia i faaite. (Genese 32:29; Te mau tavana 13:17, 18) Aita te Bibilia e horoa ra i te tapura iˈoa o te mau melahi, ia ore hoi te taata e haapao roa ino ia ratou.

Hoê o te mau ohipa a te mau melahi, o te faaiteraa ïa i te mau poroi no ǒ mai i te Atua ra i te taata. Inaha, te auraa mau o na taˈo tumu Hebera e Heleni hurihia ei “melahi” oia hoi “vea.” Teie râ, aita te mau melahi e tavini ra ei arai o te afai i te mau pure a te taata i te terono o Tei Teitei. Ua faaoti te Atua e ia faataehia te mau pure ia ˈna ra na roto i te iˈoa o ta ˈna Tamaiti, o Iesu Mesia, o tei parau e: “Ia horoa mai te Metua ia outou i ta outou e ani atu ma to ˈu nei iˈoa ia ˈna ra.”—Ioane 15:16; Timoteo 1, 2:5.

E ere roa ˈtu te Atua ra o Iehova i te mea ohipa roa no te faaroo ia tatou ia tapiri tatou ia ˈna ma te au. Te horoa nei te Bibilia i teie haapapuraa: “Te fatata maira Iehova i te feia e tiaoro atu ia ˈna, i te feia atoa i tiaoro atu ia ˈna ma te haavare ore.”—Salamo 145:18.