Te hoê manaˈo haava tia

I TE hoê mahana i te hoˈiraa ˈtu i te fare mai te ohipa mai, ua moe ta Charles vini e rave ohipa o ˈna i te fare haapiiraa tuatoru i Kenya. I Kenya, e taihaa moni rahi noa tera.

“Aita vau i manaˈo e faahoˈi mai te hoê taata i te reira,” ta Charles ïa i parau. Teie râ, tau mahana i muri aˈe, ua maere o ˈna i te niuniuraahia ˈtu o ˈna e te piha ohipa a te amaa a te mau Ite no Iehova i Kenya. Aita o ˈna i tiaturi roa i ta ˈna i faaroo i to ˈna aniraahia e haere e tii i ta ˈna vini! Na te hoê Ite no Iehova tavini taime taatoa o tei rave i te hoê â pereoo e o Charles i ite i te vini. No te imi i te fatu, ua afai teie tavini i te vini i te piha a te amaa, e ua iteahia mai o Charles e te mau rima tauturu no reira maoti te numera i nia i te vini.

“Te mauruuru roa nei au no te mau tutavaraa i ravehia no te imi ia ˈu noa ˈtu te fifi o te reira,” ta Charles ïa i parau i roto i te hoê rata ta ˈna i papai i te piha a te amaa. “Te haamauruuru nei au ma te haavare ore i te mau melo o ta outou faanahonahoraa o tei ite i ta ˈu vini, tei imi ia ˈu e tei faahoˈi mai. E ere i te mea ohie ia ite i te hoê taata haerea tia i teie tau, e faaitoitoraa râ e te vai ra te tahi pae e Ite mau ratou no te Atua ra o Iehova.”

Ua matauhia te mau Ite no Iehova na te mau vahi atoa no to ratou haerea tia. Te pee nei ratou i te aposetolo Paulo o tei parau e: “Ua ite mau . . . matou e, te tia nei to matou [manaˈo haava], i te opuaraa e ei haapao maitai ta matou i te mau mea atoa nei.” (Hebera 13:18; MN; Korinetia 1, 11:1) Ua taa ia ratou e e faahanahana tera haerea i te Atua ra o Iehova, mai ta Iesu i parau: “To outou maramarama, ia anaana ïa i mua i te aro o te taata nei, ia hiˈo ratou i ta outou parau maitai, e ia haamaitai i to outou Metua i te ao ra.”—Mataio 5:16.