Ia riro te mau parau fafau ei haapapuraa

UA Î te tuatapaparaa i te parau fafau i ore i tupu. E pinepine aita te mau nunaa i tapea i te mau parau faaau tarima-maite-hia e patoi ra i te aroraa, a aratai atu ai i to ratou mau taata i roto i te mau tamaˈi riaria. I te hoê mahana ua faataa o Napoléon e: “E tapea te mau faatereraa i ta ratou parau fafau ia faahepohia ratou, aore ra no to ratou maitai.”

Eaha ïa no te mau parau fafau a te taata? Auê ïa inoinoraa ia ore te hoê taata e tapea i ta ˈna parau! Mai te peu iho â râ e e taata ta outou i matau e ta tatou e tiaturi. Oia mau, eita paha e maraa i te taata aore ra eita ratou e hinaaro e tapea i ta ratou mau parau fafau.

Auê ïa taa-ê-raa i rotopu i te mau parau fafau a te taata e ta te Atua! E mea papu e te tiaturi roa te mau parau fafau a te Atua. E haapapuraa te mau parau fafau atoa a te Atua ra o Iehova. E mea papu e e tupu te reira. Te na ô nei te Isaia 55:11 no nia i te parau hape ore a te Atua e: “Oia atoa te parau no roto i to ˈu nei vaha; e ore e hoˈi faufaa ore noa mai ia ˈu nei, e tupu râ tei opuahia e au ra; e noaa hoi te mea i faaue atu ai au ra.”

E no reira, e nafea tatou ia hiˈo i te mau parau fafau a te Atua i roto i te Bibilia e tia ˈi? E nehenehe mau â ta tatou e tiaturi atu. Ei hiˈoraa, ua papai te aposetolo Ioane e: “Inaha tei ǒ te taata ra te sekene o te Atua, e e parahi oia i roto ia ratou ra, e ei taata ratou no ˈna, e ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.” (Apokalupo 21:3, 4) E nehenehe outou e fanaˈo i tera mau haamaitairaa ia ohipa outou ia au i te mau parau a Iesu: “Teie hoi te ora mure ore, ia [noaa to] ratou [ite] ia oe i te Atua mau ra, e ia Iesu i te Mesia i ta oe i tono mai.”—Ioane 17:3; MN.