Te titau-manihini-hia ra outou ma te mahanahana

E ERE te Amuraa maa ahiahi ta te Fatu ra o Iesu Mesia i haamau fatata a 2000 matahiti aˈenei i te hoê aamu faahiahia o te tuatapaparaa. Ua ohipa puai te reira i nia i te mau taata mai to ˈna iho â avariraahia. Ma te putapû i ta ratou i taio i roto i te mau Evanelia o te faatia ra i te ohipa i tupu i tera po, ua tutava e rave rahi i te haamanaˈo i te Amuraa maa ahiahi a te Fatu ma te ravea rau.

Te taa ra ia tatou te reira, i te mea e ua faaue o Iesu Mesia iho i ta ˈna mau pǐpǐ e haapao i tera oroa e te tamau nei ratou i te na reira. Ua parau maitai o ˈna ia ratou e: “E na reira outou ei manaˈoraa ia ˈu.”—Luka 22:19; Korinetia 1, 11:23-25.

Oia mau, ia riro tera oroa ei mea hoona mau, mea titauhia ia taa maitai tatou i te auraa o te reira, e itehia i roto i te Parau a te Atua, te Bibilia. Hau atu â, mea faufaa ia ite eaha ta te Bibilia e parau ra no nia i te taime e e nafea te oroa e faatupuhia ˈi.

Ma te auraro i te faaueraa a Iesu, e putuputu te mau Ite no Iehova na te ao nei i te ahiahi Mahana toru 16 no Eperera 2003, no te haamanaˈo i te poheraa o Iesu. E taime te reira no te hiˈopoa i te mau Papai e no te faaapî i to ratou faaroo e to ratou here i te Fatu ra o Iesu Mesia, o tei parau e: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” (Ioane 3:16) Te titau-manihini-hia ra outou ma te mahanahana ia putuputu e o ratou i tera ahiahi e nehenehe ai outou e haapaari i to outou faaroo e to outou here ia Iesu Mesia e te Metua i te raˈi, te Atua ra o Iehova.