Mau uiraa a te feia taio

Eaha te auraa o ta Paulo parau: “Ua amu anaˈe outou i teie nei pane, e ua inu anaˈe i teie nei auˈa”?

Teie ta Paulo i papai no nia i te haamauraahia te Oroa haamanaˈoraa i te poheraa o Iesu: “Ua amu anaˈe outou i teie nei pane, e ua inu anaˈe i teie nei auˈa, ua faaite â ïa outou i te pohe o te Fatu, e tae noa mai oia ra.” (Korinetia 1, 11:25, 26) Te manaˈo ra te tahi pae e te faaite ra te taˈo ra “anaˈe” i ǒ nei e ia haamanaˈo-pinepine-hia te poheraa o te Mesia, oia hoi e rave rahi taime. No reira ratou e faatupu ai i taua oroa ra hau atu i te hoê taime i te matahiti. Tera anei te auraa o ta Paulo parau?

E fatata e 2000 matahiti i teie nei to Iesu haamauraa i te Oroa haamanaˈoraa i to ˈna poheraa. No reira, te auraa atoa e faatupu i te Oroa haamanaˈoraa hoê taime i te matahiti, oia ïa ua faatupu-pinepine-hia te reira mai te matahiti 33 T.T. mai â. Ia au râ i te mau irava tapiri o te Korinetia 1, 11:25, 26, te parau ra Paulo e nafea ia faatupu i te Oroa haamanaˈoraa, eiaha râ ehia taime. I roto i te reo Heleni tumu, aita oia i faaohipa i te taˈo ra pol·laʹkis, te auraa ra “pinepine.” Ua faaohipa maori oia i te taˈo ra ho·saʹkis, te auraa ra “anaˈe,” te hoê tuuraa parau oia hoi te auraa “ia,” “i te mau taime atoa.” Te na ô ra ïa Paulo e: ‘I te mau taime atoa e na reira ˈi outou, ua faaite â ïa outou i te pohe o te Fatu.’

Ehia ïa taime i te matahiti e tupu ai te Oroa haamanaˈoraa i te poheraa o Iesu? I te tanoraa, hoê noa taime i te matahiti. E haamanaˈoraa iho â tera, e mea matauhia e e tupu te mau haamanaˈoraa i te mau matahiti atoa. Hau atu â, ua pohe Iesu i te mahana o te oroa Pasa ati Iuda, o te tupu hoê taime i te matahiti. Ma te tano, ua faahiti Paulo ia Iesu mai ‘te Mesia ta tatou pasa,’ no te mea maoti te pohe tusia o Iesu i nehenehe ai te Iseraela pae varua e ora, mai te tusia Pasa matamua o tei faaora i te mau matahiapo a te Iseraela pae tino e tei faatiamâ i te nunaa i te faatîtîraa. (Korinetia 1, 5:7; Galatia 6:16) Te haapapu atoa ra teie taairaa i te oroa Pasa ati Iuda o te tupu i te mau matahiti atoa e e tupu te Oroa haamanaˈoraa i te poheraa o Iesu hoê noa taime i te matahiti.

Hau atu â, ua taai Paulo i te poheraa o Iesu i te tahi atu oroa matahiti ati Iuda, te Mahana taraehara. Te taio nei tatou i roto i te Hebera 9:25, 26 e: ‘E ere ia pûpû pinepine [Iesu] ia ˈna iho ei tusia, mai te tahuˈa rahi i tomo i roto i te vahi moˈa i te mau matahiti atoa [i te Mahana taraehara], ma te toto ê ra. . . . Hoê roa râ o ˈna faaiteraahia mai i teie nei, i te hopea o te mau tau nei, ia faaore oia i te hara i te faatusiaraa ia ˈna iho.’ I te mea e ua mono to Iesu tusia i te tusia matahiti i te Mahana taraehara, mea tano ïa ia tupu te Oroa haamanaˈoraa i to ˈna poheraa i te mau matahiti atoa. Aita e tumu bibilia e tupu ai te Oroa haamanaˈoraa hau atu i te hoê taime i te matahiti.

Ia au i teie haamaramaramaraa, te tapao ra te taata tuatapapa ra o John Laurence von Mosheim e ua matau te mau Kerisetiano no te senekele piti i Asia Iti i te faatupu i te Oroa haamanaˈoraa i te poheraa o Iesu “i te ahuru ma maha o te mahana o te avaˈe ati Iuda matamua [Nisana].” I te mau matahiti noa i muri mai te haamataraa te peu e faatupu i te reira hau atu i te hoê taime i te matahiti i roto i te Amuiraa faaroo Kerisetiano.