Te haamanaˈo ra anei outou?

Ua au anei outou i te taioraa i te mau numera hopea o Te Pare Tiairaa? A hiˈo mai te peu e e nehenehe ta outou e pahono i te mau uiraa i muri nei:

• E nafea te “ite i te feruri” e paruru ai? (Maseli 1:4, MN)

E faaara mai te reira no nia i te mau mea atâta i te pae varua e e turai ia tatou ia opua i te haerea e tano, mai te aperaa i te mau faahemaraa morare ore i te vahi raveraa ohipa. E tauturu te reira ia tatou ia farii e mea tia ore te mau hoa Kerisetiano, a turai atu ai ia tatou ia ore ia haa oioi roa ia haapeapeahia tatou. E tauturu atoa te reira ia tatou ia ape i te faaheporaa a te nounou taoˈa o te faatipuu ia tatou i te pae varua.—15/8, api 21-4.

• E nafea te hoê taata tapiri e hopoi mai ai i te maitai?

E piti ravea e riro ai ei taata tapiri maitai, o te riroraa ei taata horoa aau tae e ei taata rave mai aau mehara. Mea faufaa ia riro ei taata tapiri maitai ia tupu te ati. Te faaitoito ra te mau Ite no Iehova i te riro ei taata-tupu maitai na roto i te faaararaa ia vetahi ê no nia i te hoê ohipa e fatata i te tupu, oia hoi te faaoreraa te Atua i te ino.—1/9, api 4-7.

• Ia au i te Bibilia, o vai te mau peata mau, e e nafea ratou e tauturu ai i te taata?

O te taatoaraa o te mau Kerisetiano matamua te mau peata, aore ra te feia moˈa mau, tei haamoˈahia e te Atua, eiaha te taata aore ra te tahi mau faanahonahoraa. (Roma 1:7) Ua faatia-anaˈe-hia ratou no te ora i nia i te raˈi, e apiti atu te feia moˈa i te Mesia i roto i te haamaitairaa i te feia taiva ore i nia i te fenua. (Ephesia 1:18-21)—15/9, api 5-7.

• Eaha te faufaaraa no te mau Kerisetiano ia ite i te tahi mau haa tuaro i Heleni no tahito ra?

I roto i ta raua mau rata, ua faaohipa na aposetolo Paulo e Petero i te tahi mau faahohoˈaraa i niuhia i nia i te mau hautiraa no tahito ra aore ra ua faahitihiti i te reira. (Korinetia 1, 9:26; Timoteo 1, 4:7; Timoteo 2, 2:5; Petero 1, 5:10) No te hoê maona no tahito ra, mea faufaa te hoê taata faaineine maitai, te haapao-maitai-raa, e te faatano-maitai-raa i ta ˈna mau tutavaraa. Hoê â atoa no te mau tutavaraa pae varua a te mau Kerisetiano i teie mahana.—1/10, api 28-31.

• Eaha te mau fifi e te mau haamaitairaa o te aupururaa i te tamarii i te fenua ê?

Mea rahi te tamarii e ite oioi aˈe i te hoê reo apî i to ratou mau metua, e fifihia ˈtu ai paha ratou ia taa i te manaˈo e te huru o ta ratou mau tamarii. E eita paha e taa oioi i te mau tamarii te mau haapiiraa bibilia na roto i te reo o to ratou mau metua. E nehenehe râ te taairaa utuafare e haapaarihia a haapii ai te mau metua i to ratou reo i ta ratou mau tamarii, a ite atu ai ratou e piti reo e a matau ai e piti taˈere.—15/10, api 22-6.

• No te aha e mea faufaa ia haapii i te tatarahapa?

E pinepine, e ravea maitai te hoê parau tatarahapa haavare ore e afaro ai te hoê peapea. Te horoa ra te Bibilia i te tahi mau hiˈoraa e faaite ra i te mana o te hoê parau tatarahapa. (Samuela 1, 25:2-35; Ohipa 23:1-5) E pinepine, ia peapea e piti taata, o raua e piti atoa tei hape. No reira, mea titauhia ia tuu e ia tatarahapa te tahi i te tahi.—1/11, api 4-7.

• No te aha e mea ino ia pere, noa ˈtu e mea haihai te moni e tuuhia?

E faaitoito te pere i te teoteo, te feruriraa tataˈu, e te nounou, e mau mea anaˈe e faahapahia e te Bibilia. (Korinetia 1, 6:9, 10) Mea rahi te taata matau roa i te pere tei haamata i to ratou nainairaa na roto i te tuuraa i te moni haihai.—1/11, api 31.

• Mea rahi hoi te buka bibilia i papaihia na roto i te reo Heleni, no te aha ïa i hinaarohia ˈi ia huri i te Bibilia ei reo Heleni, e eaha te mau faahopearaa?

Mea ê roa te reo Heleni no teie tau i te reo Heleni o te mau Papai Hebera i hurihia e te Septante e i to te mau Papai Heleni Kerisetiano. I te mau senekele i mairi aˈenei, ua tutavahia i te huri i te tahi tuhaa aore ra i te taatoaraa o te Bibilia ei reo Heleni matauhia. I teie nei, te vai ra fatata e 30 huriraa o te taatoaraa aore ra o te hoê tuhaa o te Bibilia o te taahia e te Heleni au noa, o te Bibilia Les Saintes Écritures—Traduction du monde nouveau te hoê huriraa faahiahia tei matara mai i te matahiti 1997.—15/11, api 26-9.

• No te aha e ore ai e titauhia i te mau Kerisetiano ia horoa i te ahururaa?

I raro aˈe i te Ture i horoahia ia Iseraela no tahito ra, e ravea te ahururaa no te turu i te opu o Levi e no te aupuru i te feia e hinaaro ra i te tauturu. (Levitiko 27:30; Deuteronomi 14:28, 29) Ua faaore te pohe tusia o Iesu i te Ture e to ˈna titauraa i te ahururaa. (Ephesia 2:13-15) I roto i te amuiraa matamua, e hohoˈa te reira no te mau Kerisetiano atoa ia horoa ia au i tei maraa ia ratou e ia au i ta ratou i opua i roto i to ratou aau. (Korinetia 2, 9:5, 7)—1/12, api 4-6.

• Ia au i te Apokalupo 20:8, mea rahi roa ino anei o te haavarehia e Satani i te tamataraa hopea?

Te parau ra te irava e “mai te one tahatai” te numera o te feia e haavarehia. I roto i te Bibilia, e au pinepine tera parau i te hoê numera ite-ore-hia ma te ore e faahiti i to ˈna rahi. Te huero o Aberahama tei faataahia “mai te one tahatai ra,” 144 000 ïa taata ma te ore e taio ia Iesu Mesia. (Genese 22:17; Apokalupo 14:1-4)—1/12, api 29.