I te airaa maa a te raatira pahi

E FEIA anaanatae, e maa au, e e aparauraa au maitai, o te au ïa o te tamaaraa i te airaa maa a te raatira i nia i te pahi. Teie râ, ua faaite te hoê aparauraa i te airaa maa a te raatira pahi ra o Robert Smith a te White Star Line, i te hoê amuraa maa pae varua.—Isaia 25:6.

I te matahiti 1894, i te 24raa o to ˈna matahiti, ua raatira o Robert i te pahi taie ra Kinclune of Dundee, o to ˈna ïa tere matamua na te ao nei. I muri aˈe ua raatira o ˈna i te mau pahi a te White Star, mai te Cedric, te Cevic, e te Runic.a A tere ai oia na te moana Ataranitita mai New York e tae roa i Liverpool, i Beretane, na nia i te hoê o teie mau pahi, ua farii te raatira pahi ia Charles Russell i ta ˈna airaa maa. Ua tupu to Robert anaanatae i te poroi o te Bibilia maoti ta raua Russell aparauraa, e no te tauturu ia ˈna ia haapii hau atu â, ua horoa o Russell ma te oaoa i te mau buka Études des Écritures na ˈna.

Ua papai noa o Russell i te rata, e ei faahopearaa, ua anaanatae atu â o Robert i te poroi o te Bibilia. Ua faaite o Robert i to ˈna ite apî i ta ˈna vahine. Aita i maoro, ua riro raua ei Feia haapii tamau i te Bibilia, tei matauhia i te parau i muri iho e e Ite no Iehova. I muri aˈe ua noaa ia Robert te fanaˈoraa taa ê e horoa i te mau oreroraa parau bibilia. Ei hiˈoraa, i Brisbane, i Auteralia, ua paraparau o ˈna no nia i “Te raau no Gileada” e ua faaite o ˈna e nafea te poroi i roto i te Parau a te Atua e riro ai ei “ravea no te pohe atoa i te fenua nei.” I to ˈna hoˈiraa i Beretane, ua tauturu ta ˈna vahine e ta ˈna na tamarii ia ˈna ia faaite i te “Photo-Drame de la Création,” ma te faataˈi i te mau haruharuraa o te tatararaa a Russell a patahia ˈi te mau hohoˈa.

Ua tutuu o Robert i te tufaa o te parau mau o te Basileia i roaa mai ia ˈna na ta ˈna na tamarii. I teie mahana, e pae ui i muri aˈe, 18 melo o te utuafare teie e faaite nei ma te itoito i te parau apî maitai i te tahi atu, te mauruuru nei hoi ratou no tei fanaˈohia i te airaa maa a te raatira pahi.

Maoti ta ratou mau papai e ta ratou ohipa haapiiraa bibilia, te tauturu nei te mau Ite no Iehova i te taata na te ao nei ia ite i te poroi bibilia o tei haamaere i te raatira pahi ra o Smith. E nehenehe atoa outou e ite i te mea tei riro ei mea anaanatae roa i te airaa maa a te raatira pahi.

[Nota i raro i te api]

[Hohoˈa i te api 8]

O Robert Smith

[Hohoˈa i te api 8]

O Charles Russell