Te taime maitai roa ˈˈe o te oraraa

IA FAARURU outou i te tupuraa fifi, e manaˈonaˈo anei outou i te tau oaoa i mahemo? A hiˈopoa na ïa i te mau parau a te arii paari ra o Solomona: “Eiaha oe e parau e, Eaha te mea i maitai ai tei mutaaihora anotau i teie nei anotau? aore hoi oe i ui maitai i te reira parau.”—Koheleta 7:10.

No te aha o Solomona i horoa ˈi i teie aˈoraa? No te mea ua ite o ˈna e e tauturu faufaa te tapearaa i te hoê manaˈo au noa no nia i te tau i mahemo no te faaruru i te mau tupuraa au ore o te taunei. E nehenehe mau â e moehia i te feia e manaˈonaˈo nei i te tau oaoa i mahemo e e mea î atoa taua mau mahana ra i te fifi e te peapea e e ere roa taua oraraa ra i te mea maitai roa. Ua maitai mai paha te tahi mau mea i te tau i mahemo ra, teie râ te rahiraa o te tahi atu mau mea, aita ïa. Mai ta Solomona i tapao, e ere i te mea paari ia manaˈonaˈo i te tau i mahemo, i te mea e mea papu eita tatou e nehenehe e hoˈi i muri.

Te vai ra anei te tahi fifi ia manaˈonaˈo i te tau i mahemo? E, mai te peu e e tapea te reira ia tatou eiaha e faaau ohie e e faaau atu i te taunei aore ra eiaha e haafaufaa i te mau taime ta tatou e ora nei e to tatou tiaturiraa.

Oia mau, teie te taime maitai roa ˈˈe o te oraraa, noa ˈtu te maraaraa o te mau fifi na te ao nei. No te aha? No te mea te piri ra tatou i te tupuraa o te opuaraa a te Atua no nia i to tatou fenua e te mau haamaitairaa a te faatereraa hau a to ˈna Basileia. Te tǎpǔ nei te Bibilia e: “Na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.” (Apokalupo 21:4) E i roto i te mau huru tupuraa maitai aˈe, aita e tumu e manaˈonaˈo ai te hoê taata i te tau oaoa i mahemo.