Mau tutavaraa o te paturu i te mau ture morare maitatai

I te hopea o te matahiti 2001, ua faaroohia teie parau faaite i roto i te Radio Mozambique:

“Ua mataitai te peretiteni o te Repupirita i te amaa a te mau Ite no Iehova i Maputo. Ua faaitoito oia i teie amuiraa faaroo ia haapuai i ta ratou mau tutavaraa no te paturu i te mau ture morare maitatai i roto i te mau utuafare e i roto i te haapiiraa i te feia paari maoti ta ratou porotarama haapiiraa i te taio. Ua fatata 10 000 taata tei fanaˈo aˈena i tera mau porotarama. Ia au i te Peretiteni Chissano, e tia ia haapopouhia te mau opuaraa mai teie, i te mea e ua riro te reira ei tururaa maitai i te huiraatira no te faatitiaifaro i te mau fifi i te pae haapiiraa ta teie fenua e faaruru noa râ.”

Ua tamau noa te parau faaite ma te tahi tuhaa o te oreroraa parau a te peretiteni i haruharuhia i muri nei: “Mea faaitoito roa te reira no matou ia ite e te anaanatae ra e rave rahi taata i te haapiiraa i te taio. Te faaite maira te reira e te tauturu ra te tahi mau tino huiraatira ia matou ia rahi atu â te taata i ite i te taio. No reira, e hinaaro noa vau e faaitoito i te mau Ite no Iehova ia haapuai i ta ratou porotarama haapiiraa i te taio na roto i te mau reo atoa. Te mea faufaa mau â, oia hoi, te vai ra te haapiiraa i te taio e ia tauaparau ohie aˈe te taata e i te tau i mua nei ia rahi aˈe te apitiraa mai i roto i te haapiiraa.”

Te faatere ra te mau Ite no Iehova no Mozambique i te mau piha haapiiraa i na vahi e 850 na te fenua taatoa ia nehenehe te taata e taio no ratou iho i te Parau a te Atua. Hau atu â, te faatere ra ratou fatata e 50 000 haapiiraa bibilia tamoni ore i te fare i te mau hebedoma atoa. Ua riro te reira ei tuhaa o te porotarama haapiiraa i te Bibilia na te ao atoa nei o te parare ra i teie nei i roto e 235 fenua. (Mataio 24:14) E nehenehe atoa outou e fanaˈo i tera porotarama. A farerei atu i te mau Ite no Iehova o to outou vahi.