“Te aratai ra oia ia ˈu na pihaiiho i te pape mania”

NO TE ahuaraˈi veavea o te mau fenua bibilia, e hinaaro te mau mamoe e inu i te mau mahana atoa. No reira, te hoê tuhaa faufaa o te ohipa a te hoê tiai mamoe, o te horoaraa ïa i te pape na ta ˈna nǎnǎ. I te tahi taime, e faainu te mau tiai mamoe i ta ratou nǎnǎ i te hoê apoo pape, ma te manii i te pape i roto i te mau farii ia nehenehe te mau mamoe e inu. (Genese 29:1-3) I te tau uâ iho â râ, e riro te mau hiti anavai e te mau pae tahora ei vahi hau e te rari maitai i “te pape atatia ra.”—Salamo 23:2.

E tia i te hoê tiai mamoe maitai ia ite ihea e iteahia ˈi te pape e oia atoa te vahi matie e au no ta ˈna nǎnǎ. E haapapu to ˈna ite-papu-raa i te hoê tuhaa fenua i te oraraa mai o ta ˈna mau mamoe. Ua faaau Davida, o tei haapao i te mau mamoe e rave rahi matahiti i nia i te mau aivi o Iudea, i te aratairaa pae varua a te Atua, i te hoê tiai mamoe o te aratai i ta ˈna mamoe i te mau vahi matie maitatai e i te pape ora. “Te aratai ra oia ia ˈu na pihaiiho i te pape mania,” ta Davida ïa e parau ra ia au i te tahi huriraa.—Salamo 23:1-3, New International Version.

E rave rahi matahiti i muri aˈe, na roto i ta ˈna peropheta ra o Ezekiela, ua faaohipa Iehova i te hoê â faahohoˈaraa. Ua fafau oia e haaputuputu i to ˈna nunaa mai te mau fenua i reira ratou i te purara-ê-raa, mai te hoê tiai mamoe e haaputuputu ra i ta ˈna mau mamoe. “E aratai mai au ia ratou i to ratou ihora fenua mau, a faaamu ai ia ratou i nia i te mau mouˈa o Iseraela, e te hiti o te mau pape ra,” ta ˈna ïa i haapapu ia ratou.—Ezekiela 34:13.

Te tapitapi roa atoa ra te Atua ra o Iehova i te horoaraa i te pape pae varua. Te faataa ra te buka Apokalupo “i te hoê pape ora” o te tahe ra no roto mai i te terono o te Atua. (Apokalupo 22:1)Te faataehia ra te titau-manihini-raa e inu i te pape no roto mai i tera anavai i te mau nunaa atoa. ‘E nehenehe tei hinaaro ra e rave noa mai i te pape ora.’—Apokalupo 22:17.

Te faahohoˈa ra teie pape ora taipe i te mau faanahoraa a te Atua no te ora mure ore. E nehenehe te taata atoa e inu i teie pape ma te farii i te ‘ite i te Atua mau ra, e ia Iesu i te Mesia ta ˈna i tono mai.’—Ioane 17:3.