“E vahine haapao maitai oe”

Ua faataehia ˈtu teie mau parau haapopou i te hoê vahine Moabi apî. E vahine ivi o ˈna o Ruta te iˈoa, te hunoa a te vahine ati Iseraela ra, o Naomi. I ora na oia i Iseraela fatata a 3 000 matahiti aˈenei, a faatere ai te mau tavana, ua tui te roo o Ruta no to ˈna haapao maitai. (Ruta 3:11) Mea nafea te noaaraa ia ˈna teie roo? O vai te faufaahia i to ˈna hiˈoraa?

E ere o ˈna i te taata e amu “i te maa i noaa i te faatau ra,” ua rave o Ruta i te ohipa e rave rahi hora i te maoro e ma te itoito rahi ei taata ohi i te toea i roto i te mau faaapu, no to ˈna hoi itoito rahi i haapopouhia ˈi oia. Noa ˈtu e ua pûpûhia ˈtu ia ˈna te ravea no te haamâmâ i ta ˈna ohipa teimaha, ua tamau noa o ˈna i te haa puai, i te rave hau atu â i tei titauhia. Ma te faahiahia, ua tuea o ˈna i te faataaraa a te Bibilia no nia i te vahine popou, te aravihi, e te itoito.—Maseli 31:10-31; Ruta 2:7, 15-17.

O te mau huru maitatai i te pae varua ïa o Ruta—to ˈna haerea haehaa, te huru haapae ia ˈna iho e to ˈna aroha taiva ore—te mau tumu rahi i fanaˈo ai oia i te roo maitai. Ma te faarue i to ˈna mau metua e to ˈna fenua tumu, mea iti hoi te tiaturiraa e itea mai ai te panoonoo ore ta te faaipoiporaa e horoa mai, ua faaea o ˈna i pihai iho ia Naomi. I taua atoa taime ra, ua faaite o Ruta i to ˈna hinaaro e tavini ia Iehova, te Atua o to ˈna metua hoovai vahine. No te haamahitihiti i to ˈna faufaaraa, te na ô ra te faatiaraa a te mau Papai e e ‘maitai rahi to ˈna ia Naomi i te tamarii e ia hitu noa ˈtu.’—Ruta 1:16, 17; 2:11, 12; 4:15.

Noa ˈtu te maitai o te roo o Ruta i roto i to ˈna mau hoa taata, mea faufaa ˈtu â te farii maitai a te Atua i to ˈna mau huru maitatai e ta ˈna haamaitairaa ˈtu ia ˈna i te fanaˈoraa taa ê e riro ei tupuna no Iesu Mesia. (Mataio 1:5; Petero 1, 3:4) E hiˈoraa maitai mau â o Ruta eiaha noa no te mau vahine Kerisetiano, teie râ, no te feia atoa e parau ra e haamori ia Iehova!