E numera anei outou i te haamâuˈaraa?

UA PÛPÛ Iesu Mesia i te tiaturiraa o te ora mure ore na ta ˈna mau pǐpǐ, ua faaitoito atoa râ oia ia ratou ia numera i te haamâuˈaraa o te riroraa ei Kerisetiano. Ua faahohoˈa oia i teie manaˈo na roto i te uiraa: “O vai ïa taata i ǒ outou nei ia opua i te fare e faatia, e ore e mata na i te parahi i raro, a taio ai i te taoˈa [aore ra, a numera ˈi i te haamâuˈaraa] e oti ai, i te navairaa ta ˈna taoˈa?” (Luka 14:28) Teihea haamâuˈaraa ta Iesu e parau ra?

E faaruru te mau Kerisetiano atoa i te mau tamataraa—mea ino te tahi. (Salamo 34:19; Mataio 10:36) No reira, e titauhia ia tatou ia ineine i te pae feruriraa e varua ia ore tatou e hitimaue ia faaû tatou i te patoiraa aore ra te tahi atu mau fifi. E tia ia tatou ia numera aˈena i teie mau fifi i roto i te haamâuˈaraa e riro ei pǐpǐ na te Mesia, ma te ite e mea faufaa roa ˈˈe te haamaitairaa—te faaoraraa mai i te hara e te pohe—i te mau mea atoa ta teie nei faanahoraa e nehenehe e pûpû na tatou. Oia, aita hoê aˈe mea ta te Atua e faatia—tae noa ˈtu te pohe—e nehenehe e haafifi tamau ia tatou mai te peu e e tavini noa tatou ia ˈna.—Korinetia 2, 4:16-18; Philipi 3:8.

Nafea to tatou faaroo e puai ai? E puai atu â to tatou faaroo i te mau taime atoa e rave ai tatou i te hoê faaotiraa tano, e turu papu ai tatou i te mau faaueraa tumu Kerisetiano, aore ra e rave ai tatou i te hoê ohipa ia au maite i te hinaaro o te Atua—ia faahepohia iho â râ tatou ia rave i te mea taa ê roa. Ia ite tatou i te haamaitairaa a Iehova ei faahopearaa o to tatou haerea haapao maitai, e puai to tatou faaroo e e hohonu atu â. Ia na reira tatou, te pee ra tatou i te hiˈoraa o Iesu, o ta ˈna mau pǐpǐ matamua, e o te mau tane e mau vahine faaroo atoa o tei ‘numera maitai i te haamâuˈaraa’ e tavini i te Atua i te roaraa o te mau tau.—Mareko 1:16-20; Hebera 11:4, 7, 17, 24, 25, 32-38.