Mea nafea to te hoê tamaiti tautururaa i to ˈna metua tane
E HUMA roro o James, no Beretane, e e 30 matahiti e tiahapa to ˈna. E rave rahi râ matahiti to ˈna apiti-noa-raa i roto i te mau putuputuraa a te mau Ite no Iehova e to ˈna metua vahine e to ˈna tuahine. Aita râ to ˈna metua tane i faaite rii noa ˈˈe i te anaanatae i ta ratou mau tiaturiraa. I te hoê ahiahi, i muri aˈe i te putuputuraa i reira te faahiˈoraahia e nafea ia titau manihini i te hoê hoa i te Oroa haamanaˈoraa i te poheraa o te Mesia, haere oioi atura o James i roto i to ˈna piha. Ma te taiâ, ua apee to ˈna metua vahine ia ˈna e ite atura te paheru haere noa ra i te mau Pare Tiairaa e te mau A ara mai na! tahito. Ua maiti oia hoê te vai ra te titau-manihini-raa i te Oroa haamanaˈoraa i te api hopea e horo atura i to ˈna metua tane ra. Ua toro na mua oia i to ˈna rima i nia i te hohoˈa e i muri iho i nia i to ˈna papa e parau atura e “Oe!” Hiˈo atura to ˈna mama e to ˈna papa te tahi i te tahi ma te maere rahi i te taaraa ia raua e te titau manihini ra o James i to ˈna papa i te Oroa haamanaˈoraa. Parau atura to ˈna metua tane e e haere paha oia.
I te ahiahi o te Oroa haamanaˈoraa, ua haere atu o James i te vairaa ahu o to ˈna papa ra, maiti ihora i te tahi piripou avae roa, hopoi atura i to ˈna papa ra, e ma te apa ˈtu i te rima, faaue ihora e oomo. Pahono maira to ˈna papa e eita oia e haere i te putuputuraa. Haere noa ˈtura ïa o James e to ˈna mama i te Piha a te Basileia raua anaˈe.
Teie râ, ia maoro rii aˈe, ia faaineine to ˈna metua vahine ia ˈna no te haere atu i te mau putuputuraa a te amuiraa, ua faaroo atâ noa ˈtu â o James a faaoti atu ai e faaea maoti i te fare e to ˈna papa. I muri iho, i te hoê poipoi Tapati, ua patoi â o James i te auraro i to to ˈna mama faaineineraa ia ˈna no te putuputuraa. Auê ïa to ˈna maere rahi i te fariuraa mai to ˈna metua tane ia ˈna ra e parauraa mai e, “e James, mai te peu e haere au i te putuputuraa i teie mahana, e haere anei oe?” Anaanatae mai nei te mata o James. Haru atura oia i to ˈna papa e parau atura e “E!” e haere atura ratou e toru atoa i te Piha a te Basileia.
Mai reira mai, ua tamau noa te metua tane o James i te haere i te mau putuputuraa i te mau Tapati atoa, e aita i maoro, ua faaara oia e ia hinaaro oia e haere i mua, e haere ïa oia i te mau putuputuraa atoa. (Hebera 10:24, 25) O ta ˈna ïa i rave, e e piti avaˈe i muri iho, ua haamata oia i te haapii tamau i te Bibilia. Ua haere oioi o ˈna i mua, e aita i maoro to ˈna faatupuraa i te mau tauiraa i titauhia i roto i to ˈna oraraa, e te haamataraa i te apiti i roto i te ohipa pororaa i te Basileia. Hoê matahiti i muri aˈe i to ˈna haamataraa i te haapii i te Bibilia, ua pûpû o ˈna i to ˈna ora na Iehova e ua faataipe i te reira na roto i te bapetizoraa. Te tavini ra oia i teie nei ei tavini tauturu i roto i ta ˈna amuiraa. I teie nei, o te utuafare taatoa teie e tavini nei ia Iehova ma te tahoê.