Aita e otia to te mau paruparu pae tino

UA HARUHIA o Christian, e faaea ra i te hoê fenua i Afirika, e te tahi mau faehau o tei tamata i te faahepo ia ˈna ia faaô i roto i te nuu, aita râ oia i farii atu no to ˈna manaˈo haava i haapiihia ia au i te Bibilia. Ua afai atura te mau faehau ia ˈna i te hoê aua a te nuu i reira to ˈna taparahiraahia e maha mahana i te maoro, i muri iho, ua pupuhi hoê o ratou i to ˈna avae. Ua noaa ia Christian i te haere i te hoê fare maˈi, tera râ, ua tâpû-ê-hia to ˈna avae i raro mai i te turi. I te tahi atu fenua i Afirika, ua tâpû ê atoa te tahi mau taata orure hau e pupuhi ta ratou i te tahi mau melo o te tahi mau tamarii nainai. E mai te Cambodge e haere roa i te mau Balkans, mai te Afghanistan e haere roa i Angola, te tamau noa ra te mau ofai paaina i te tâpûpû e i te haaparuparu i te feia apî e te ruhiruhia aita e hiˈoraa.

Te vai atoa ra te mau ati e te maˈi, mai te omaha tihota. E nehenehe atoa te mau taero i roto i te natura e haaparuparu i te tino. I te mau vahi tapiri i te hoê oire rahi i Europa Hitia o te râ, ei hiˈoraa, ua fanauhia mai te tahi mau tamarii e aita hoê o to ratou nau rima i raro mai i te poro rima. E toea melo poto noa to ratou i raro mai i te poro rima. Ia au i te mau haapapuraa, na te haaviiviiraa taero i faaino i te ihi tapao tupuna. Mea rahi atu â te taata e te vai ra to ratou mau melo taatoa, mea paruparu râ no te hapepa aore ra te tahi atu â ati. Oia mau, aita e otia to te mau paruparu pae tino.

Atira noa ˈtu, e nehenehe te mau paruparu pae tino e vavahi i te taata. Ua ere o Junior i to ˈna avae aui i raro mai i te turi i te 20raa o to ˈna matahiti. Ua parau oia i muri aˈe e: “Mea rahi to ˈu mau fifi i te pae o te huru aau. E taˈi noa vau no te mea aita to ˈu e avae faahou. Aita vau i ite e nafea. Ua feaapiti au.” I muri aˈe râ, ua taui roa to Junior manaˈo. Ua haamata oia i te hiˈopoa i te Bibilia e ua haapii mai oia i te mau mea o tei ore noa i tauturu ia ˈna ia faaoromai, o tei horoa atoa mai râ i te hoê tiaturiraa faahiahia o te hoê oraraa oaoa no a muri aˈe i ǒ nei i nia i te fenua. Mai te peu e mea paruparu outou, e hinaaro anei outou e ite atoa i taua tiaturiraa ra?

Mai te peu e e, a taio ïa i te tumu parau i muri nei. Te faaitoito nei matou ia outou ia hiˈo i te mau irava i roto i ta outou iho Bibilia, ia ite outou iho eaha ta te Atua Poiete e rave a muri aˈe no te feia e haapii no nia i ta ˈna opuaraa e e faaau i to ratou oraraa i nia i te reira.