E ere i te mea ruau roa no te haapii

UA FANAUHIA o Kseniya i te matahiti 1897. E toru ta ˈna tamahine, hoê tamaroa, 15 mootua e e 25 hina. I roto i to ˈna oraraa taatoa, ua rave oia i te mea ta to ˈna mau metua i haapii ia ˈna ia rave. Noa ˈtu e ua reva ˈtu oia i Moscou ei vahine horo ê i te Repupirita no Abkhazie tei amahamaha i te tamaˈi, i rotopu i te Miti Ereere e te Caucase, ua oaoa mau oia i to ˈna oraraa, i te mea iho â râ ta ˈna e parau ra to ˈna faaroo i tutuuhia mai.

I te matahiti 1993, ua riro mai ta Kseniya tamahine o Meri ei Ite no Iehova. Ua haamata o Meri i te paraparau ia Kseniya no nia i te Atua ra o Iehova e no nia i te Bibilia, aita râ oia i hinaaro e faaroo. Ua parau noa Knesiya i ta ˈna tamahine e: “Ua ruau roa vau no te haapii i te mau mea apî.”

Ua tamau noa râ ta ˈna tamahine Meri; ta ˈna hunoa mootua vahine, Londa; e ta ˈna nau hina o Nana raua o Zaza, o tei riro paatoa ei Ite no Iehova, i te paraparau ia ˈna no nia i te Bibilia. I te hoê ahiahi i te matahiti 1999, ua taio ratou i te hoê irava ia Kseniya o tei haaputapû i to ˈna mafatu. Te vai ra i roto te mau parau putapû a Iesu i te mau aposetolo haapao maitai ia ˈna i haamau i te Amuraa maa ahiahi a te Fatu. (Luka 22:19, 20) I te 102raa o to ˈna matahiti, ua opua Kseniya i taua ahiahi ra e haamata i te haapii i te Bibilia.

“I muri aˈe i te oraraa 102 matahiti i te maoro,” ta Kseniya ïa e parau ra, “ua taa ia ˈu te auraa o te oraraa i te pae hopea. Te ite nei au i teie nei e aita ˈtu e mea maitai aˈe i te taviniraa i to tatou Atua faahiahia e te î i te here ra o Iehova. Te etaeta noa ra vau e te oraora maitai. E nehenehe ta ˈu e taio aita e titia mata e e haa amui e to ˈu utuafare.”

I te 5 no Novema 2000, ua bapetizohia Kseniya. Te na ô ra oia e: “Te horoa nei au i to ˈu oraraa na Iehova no te tavini ia ˈna ma te here. E vaiiho vau i te mau vea e te mau api parau iti a parahi noa ˈi au i te vahi tapearaa pereoo uta taata i pihai iho i to ˈu fare. E haere pinepine mai te mau fetii e farerei ia ˈu, e e oaoa vau i te faaite ia ratou i te parau mau no nia ia Iehova.”

Te tiai noa nei Kseniya i te mahana e ‘rahi ai te poria o to ˈna tino i to te tamaiti e e hoˈi ai oia i tana apîraa ra.’ (Ioba 33:25) Mai te peu e aita te hoê taata hanere matahiti to ˈna e manaˈo ra e mea ruau roa oia no te haapii i te auraa o te oraraa i roto i te Bibilia, e o outou?