Nafea outou e ora ˈtu ai i te hopea o teie nei ao?

TE FAATAA ra te Bibilia i te hopea o teie nei faanahoraa o te mau mea mai te hoê ‘mahana riri, e mahana ati rahi e te mauiui; e mahana pau rahi e te pohe; e mahana pouri e te rumaruma; e mahana ata rahi e te pouri taˈotaˈo.’ (Zephania 1:15) Papu maitai e e ere o teie huru mahana ta outou e tiai ru atu! Teie râ, ua aˈo te aposetolo Petero i to ˈna mau hoa Kerisetiano ia ‘tiai e ia ru atu ia tae mai taua mahana o te Atua ra, te mahana e mou ai te raˈi i te tutuihia i te auahi, e e tarapape te mau mea rii tumu i te veavea rahi? Te tatari nei râ tatou i te raˈi apî e te fenua apî ta ˈna i parau maira, i te vai-mau-raa o te parau-tia ra.’—Petero 2, 3:12, 13.

Aita Petero e parau ra i ǒ nei e o te raˈi e te fenua mau te mou. Te “raˈi” e te “fenua” ta Petero e faahiti ra i roto i teie mau irava, e taipe ïa o teie nei mau faatereraa taata viivii e o te ao taata paieti ore. Eita te “mahana o te Atua” e haamou i te fenua iho, o ‘te feia rave hara atoa râ i roto ia ˈna ra te haamouhia e ana.’ (Isaia 13:9) No te feia râ e ‘autâ noa ra e e pii hua ra no te mau parau faufau atoa’ e ravehia ra i roto i te ao taata ino i teie mahana, e riro ïa te mahana o Iehova ei mahana faaoraraa.—Ezekiela 9:4.

Nafea ïa te taata e faaorahia ˈi i te “mahana rahi riaria o Iehova”? Te pahono ra “te parau a Iehova” faaitehia i te hoê o ta ˈna mau peropheta, i taua uiraa ra: “E riro hoi e, o tei tau i te iˈoa ra ia Iehova, o te faaorahia ïa.” (Ioela 1:1; 2:31, 32) E oaoa te mau Ite no Iehova i te tauturu ia outou ia ite eaha te auraa e tau aore ra e tiaoro i te iˈoa o Iehova.