E huru paari to ratou

“E PAARI to te feia paari, e huru paari atoa râ to te tamarii,” o ta te hoê ïa maseli no Nigeria e parau ra. Ua manaˈo o Edwin, te hoê matahiapo Kerisetiano no Nigeria e e parau mau te reira.

I te hoê mahana, ua itea mai ia Edwin te hoê afata metara i raro aˈe i ta ˈna iri papairaa parau i te fare.

“Na vai teie mea?” o ta Edwin ïa i ui i ta ˈna na tamarii e toru.

“Na ˈu,” o ta Emmanuel ïa, e 8 matahiti, i pahono. Ua na ô oioi â oia e no te mau ô no te ohipa a te mau Ite no Iehova na te ao atoa nei taua afata tutae auri ra, 12 tenetimetera tuea, e apoo to nia. “No te mea eita vau e haere i te Piha a te Basileia i te mau mahana atoa,” o ta ˈna ïa i faataa, “ua faaoti au e hamani i te hoê afata e, i te mau taime atoa eita vau e haamâuˈa i ta ˈu moni amuamuraa, ia nehenehe au e tuu i roto.”

E afata ta te papa o Emmanuel i te fare no te haaputu i te moni no te haere i te tairururaa mataeinaa tamatahiti. No te hoê râ ohipa utuafare ru, ua faaohipahia te moni e vai ra i roto. No te haapapu eiaha ta ˈna ô moni ia faaohipahia no te tahi fa ê atu, ua hopoi o Emmanuel i te hoê punu tahito i te hoê taata tapiri auri ra ia tapiri atu oia. I to te taata tapiri auri iteraa i te fa o te punu, ua hamani oia i te hoê afata i te auri faarue na Emmanuel. Ua ani atoa o Michael, te teina e 5 matahiti o Emmanuel, i te hoê afata.

Ma te maere roa i ta te mau tamarii i rave, ua ui Edwin ia ratou no te aha ratou i rave ai e ia hamanihia te mau afata. Ua pahono Michael e: “E hinaaro vau e horoa i te ô!”

Aita to ratou mau metua i ite e ua haaputu noa o Emmanuel, Michael, e o Uchei, to ratou tuahine e 9 matahiti, i te tahi tuhaa o ta ratou moni amuamuraa e ua tuu noa i roto i te mau afata. Nohea mai tera manaˈo to ratou? I to te mau tamarii iho â navairaa i te paari no te tapea i te moni, ua haapii to ratou mau metua ia ratou ia tuu i te tahi maa moni i roto i te afata ô i te Piha a te Basileia. Papu maitai, ua faaohipa mau ïa te mau tamarii i ta ratou i haapii.

I te îraa te mau afata, ua ravehia e tâpû. Ua raea i te moni haaputu e 3,13 dala Marite—e ere i te mea iti no te hoê fenua i reira te moni matahiti au noa e taea ˈi tau hanere dala Marite noa. E turu taua mau ô horoa noa ra i te ohipa pororaa a te mau Ite no Iehova e ravehia ra i teie nei i na fenua e 235 na te ao atoa nei.