E te mau metua—A haamâha i te hinaaro o ta outou mau tamarii!

E HINAARO te tamarii i te aratairaa e te aˈoraa î i te here, a to ratou mau metua iho â râ. No nia i te reira, te na ô ra te hoê vahine haapii no Beresilia o Tania Zagury e: “Te hinaaro rahi o te tamarii taitahi, o te imiraa ïa i te faaoaoa. Mea faufaa ia haamau i te mau taotiaraa. E ohipa te reira na te mau metua. Ia ore noa ˈtu ratou e na reira, eita te mau tamarii e vî faahou.”

Teie râ, i te mau fenua e rave rahi e nehenehe te mana o te hoê totaiete faatiatia noa o te faahanahana i te tiamâraa o te taata e haafifi i te peeraa i te aˈoraa i nia nei. Ihea ïa te mau metua e imi ai i te tauturu? E farii te mau metua e mǎtaˈu ra i te Atua e “e tufaa” te mau tamarii “no ǒ ia Iehova ra.” (Salamo 127:3) E fariu ïa ratou i nia i te Parau a te Atua, te Bibilia, no te aratai ia ratou i roto i te haapaoraa i te mau tamarii. Ei hiˈoraa, te na ô ra te Maseli 13:24 e: “O tei vaiiho noa i te papai ra aore ïa i aroha i ta ˈna tamaiti; o tei aroha râ ia ˈna, e aˈo ïa ia ˈna i reira ra.”

Aita e faufaa ia maramarama e te faaohipa ra te Bibilia i te taˈo “papai” no te faautuaraa i te pae tino noa; te faahohoˈa ra te reira i te mau ravea aˈoraa, noa ˈtu eaha te huru. Oia mau, e pinepine roa e titau-noa-hia te mau parau no te faatitiaifaro i te haerea orure hau o te hoê tamarii. Te na ô ra te Maseli 29:17 e: “E aˈo atu oe i to tamaiti, e mauruuru oe ia ˈna i reira; oia â ïa, e oaoa to aau ia ˈna i reira.”

E hinaaro te mau tamarii i te aˈo î i te here no te tinai i te mau huru au ore. Te haapapu ra teie aˈoraa papu e te aroha e te haapao maitai ra te metua i te tamarii. (Maseli 22:6) No reira, e te mau metua, a faaitoito! Na roto i te peeraa i te aˈoraa aueue ore e te tauturu o te Bibilia, e faaoaoa outou i te Atua ra o Iehova e e faatura ta outou mau tamarii ia outou.