“I te pae hopea ua ite au eaha to ˈu!”

MEA na reira to te hoê taata i Tokyo manaˈoraa i to ˈna taioraa i te aamu i roto i te vea o Te Pare Tiairaa o te 1 no Titema 2000. Teie te tumu parau “Aita outou i ite i te mau mea e tupu ananahi,” e te faatia ra te reira i te tupuraa o te hoê mitionare tahito o te roohia ra i te maˈi tei matauhia i te pae rapaauraa mai te psychose maniacodépressive.

Te na ô ra te taata no Tokyo i roto i te hoê rata tei papaihia i te feia nenei i teie vea e: “Ua tano roa te mau tapao i faataahia no ˈu. No reira, ua haere au i te hoê fare maˈi o te rapaau i te feruriraa e ua ite au e e psychose maniacodépressive to ˈu. Ua maere te taote o tei hiˈopoa ia ˈu. Ua parau mai oia e, ‘Mea varavara te taata ma teie maˈi i te manaˈo e te maˈihia ra ratou.’ Ua tauturuhia vau ia taa i te maˈi hou a rahi roa ˈi te reira.”

Te faufaahia nei e mau mirioni taata e ati aˈe te ao na roto i te mau ravea rau i te taioraa i te vea taitahi o Te Pare Tiairaa e te vea apiti te A ara mai na! Te ite nei ratou e e horoa mai te mau tumu parau i te mau haamaramaramaraa mauruuru. Te neneihia ra Te Pare Tiairaa i teie nei na roto 141 reo, e te A ara mai na! na roto e 86 reo. E oaoa atoa outou i te taio tamau i Te Pare Tiairaa e te A ara mai na!