Hoê haapiiraa na roto i te tamara

“HOÊ hohoˈa ieie tei hope i te haviti.” Tera ta te hoê buka ite rahi bibilia e parau ra no nia i te tamara. I te tau bibilia e i teie tau, te faaunauna ra te mau tamara i te peho o te Nil i Aiphiti e te horoa atoa ra i te maru haumǎrû e ati aˈe te mau vahi ruperupe i roto i te medebara Négueb.

Mai te rahiraa o te mau huru haari papaa, mea tupu afaro noa te tamara. E naea te tahi mau tumu e 30 metera i te teitei e e tamau noa i te hotu 150 matahiti i te maoro. Oia mau, e ere noa te tamara i te mea nehenehe ia hiˈo atu, e mea hotu roa. I te mau matahiti atoa, e pue noa te mau peenave hotu tamara. E nehenehe e raea e hau atu i te 1 000 hotu tamara i roto hoê noa peenave. Teie ta te hoê taata i papai no nia i te mau hotu tamara: “Te feia o tei . . . tamata noa i te mau hotu tamara mǎrô i roto i te puohu e vai ra i muri mai i te hiˈo fare toa, aita ïa ratou i ite e mea au roa ia amu ota i te reira.”

Ma te tano, te faaau ra te Bibilia i te tahi mau taata i te mau tamara. Ia mauruuru te Atua ia ˈna, mai te hoê tamara hotu maitai, e titauhia ïa ia pee te hoê taata i te morare tia e ia tamau i te faahotu i te mau ohipa maitatai. (Mataio 7:17-20) No reira i nanaˈohia ˈi te mau hohoˈa tamara ei faaunaunaraa i te hiero a Solomona e te hiero orama a Ezekiela. (Mau arii 1, 6:29, 32, 35; Ezekiela 40:14-16, 20, 22) No reira, ia farii te Atua i ta tatou haamoriraa, mea titauhia ia faahotu tatou i te mau huru taa ê au maitai o te hoê tamara. Te faataa ra te Parau a te Atua e: “E ruperupe te taata parau-tia mai te tamara ra.”—Salamo 92:12.