Mau uiraa a te feia taio

Te parau ra te Kolosa 1:16 no nia i te Tamaiti a te Atua e “mea hamani-anaˈe-hia ïa e ana, e no ˈna anaˈe.” I roto i teihea auraa i hamanihia ˈi te mau mea atoa “no” Iesu, te Tamaiti a te Atua?

Ua faaohipa Iehova i ta ˈna Tamaiti fanau tahi ei rave ohipa aravihi i roto i te hamaniraa i te mau mea atoa, oia hoi, te mau mea atoa taa ê atu ia Iesu iho. (Maseli 8:27-30; Ioane 1:3) Ma te tano mau, mea au na te Tamaiti teie mau ohipa, e i roto ïa i teie auraa e parauhia ˈi e “no ˈna” te reira.

Ua ite tatou e oaoa roa te mau metua, e mea pinepine, i ta ratou i fanau—ta ratou mau tamaroa e mau tamahine. No reira te maseli bibilia e parau ai no “te tamaiti ta [to ˈna metua] e here ra.” (Maseli 3:12; 29:17) Oia atoa, ua oaoa te Atua ra o Iehova ia Iseraela ia haapao maitai to ˈna nunaa. (Salamo 44:3; 119:108; 147:11) E oaoa atoa oia i te taiva-ore-raa o to ˈna mau taata haapao maitai i to tatou tau.—Maseli 12:22; Hebera 10:38.

No reira, e hinaaro iho â te Atua e ia oaoa ta ˈna rave ohipa apiti o Iesu i ta ˈna mau ohipa. Oia mau, te na ô ra te Maseli 8:31 e ‘ua oaoa’ te Tamaiti ‘i te fenua i parahihia e te taata ra; e tei te mau tamarii a te taata to ˈna oaoaraa.’ I roto ïa i teie auraa e parau ai te Kolosa 1:16 e: “Mea hamani-anaˈe-hia ïa e ana, e no ˈna anaˈe.”