“E faautua mau anei te Atua i te mau taata ia tutuihia i roto i te po auahi?”

“Te haere ra anei orua i te haapiiraa teologia?”

Ua haamaere teie uiraa ia Joel e o Carl. Te hiˈo haere ra na taurearea e piti—e mau rima tauturu e tavini ra i te pu rahi a te mau Ite no Iehova i Brooklyn, i New York—i te mau buka i roto i te hoê vahi hooraa buka fatata. A hiˈopoa ˈi Joel i te mau faahororaa bibilia, faatia aˈera Carl ia ˈna i te hoê aparauraa ta ˈna i fanaˈo i roto i te taviniraa. I te mea e ua faaroo oia i te tahi mau tuhaa o teie aparauraa, ua haafatata oioi mai ra te hoê taata e tia ra na pihai iho mai ia raua.

Teie râ, ua rahi aˈe to teie taata haapeapearaa ia ˈna iho i te hinaaro e ite e te haere ra anei na taurearea e piti i te haapiiraa teologia. Te faataa ra oia e: “E ati Iuda vau, e ua parau mai te tahi o to ˈu mau hoa Kerisetiano ia ˈu e e tutuihia vau i roto i te po auahi no te mea ua patoi te mau ati Iuda ia Iesu. Ua haapeapea roa te reira ia ˈu. E au ra e e ere i te mea tano teie faautuaraa a te hoê Atua aroha. E faautua mau anei te Atua i te mau taata ia tutuihia i roto i te po auahi?”

Ua parau Joel e o Carl i teie taata haavare ore e e mau taata haapii haapao maitai raua i te Bibilia. Ua faaite raua ia ˈna maoti te mau Papai e aita e parau itea a tei pohe e te taoto noa ra ratou i roto i te pohe a tiai noa ˈi i te tia-faahou-raa. No reira, eita ratou e faaruru i te haamauiuiraa aore ra te mauiui i roto i te po auahi. (Salamo 146:3, 4; Koheleta 9:5, 10; Daniela 12:13; Ioane 11:11-14, 23-26) I te hoperaa ta raua aparauraa e 45 minuti, ua horoa te taata i to ˈna vahi nohoraa ia Joel e ia Carl e ua ani i te mau haamaramaramaraa hau no nia i te tumu parau.

Ahiri e ua riro te po auahi ei vahi haamauiuiraa, e ani anei te hoê noa ˈˈe taata ia haere i reira? Ua faatae hoi te patereareha Ioba, ma te hinaaro e ape i to ˈna mau ati, i teie aniraa e: “Na vai e horoa mai ia ˈu te reira, ia nehenehe oe e paruru mai ia ˈu i roto i te po auahi, e ia huna mai oe ia ˈu, e ia mâha noa ˈtu to oe na riri?” (Ioba 14:13, Douay Version) Papu maitai, aita Ioba i tiaturi e e vahi haamauiuiraa te po auahi. Ua imi râ oia i te parururaa i reira. Te pohe, o te hoê ïa vairaa ma te ora ore, e te po auahi o te Bibilia, o te menema ïa o te huitaata.

Mai te peu e e hinaaro outou i te mau haamaramaramaraa hau no nia i te mea e tupu ia pohe tatou e eaha te tiaturiraa e vai ra i muri aˈe, te titau-manihini-hia ˈtu nei outou ia farii i te pûpûraa i muri nei.