“Te mau haapeperaa a te hoê taua”

UA ITE te aposetolo Paulo i te faufaaraa ia horoa i te tahi aˈoraa i te mau Kerisetiano no Galatia i te senekele matamua. Peneiaˈe ia ore te tahi inoino e tupu mai, ua ui atu oia e: “E teie nei, ua riro anei au ei enemi no outou, o vau e faaite atu ia outou i te parau mau nei?”—Galatia 4:16.

Ma te ‘faaite i te parau mau,’ aita o Paulo i riro ei enemi no ratou. Oia mau, ua ohipa oia ia au i te faaueraa tumu o te Bibilia: “E mea maitai te mau haapeperaa a te hoê taua.” (Maseli 27:6, King James Version) Ua ite oia e e nehenehe te teoteo o te taata rave hara e haapepehia. Ua taa râ ia ˈna e ia ore oia e horoa i te aˈo e hinaarohia i te hoê taata hara, te auraa ïa e te faaere ra oia i te taata hara i te faaiteraa i te aroha o te Atua ra o Iehova. (Hebera 12:5-7) No reira, ei hoa haapao maitai o te anaanatae mau i te mau faufaa vai maoro o te amuiraa, aita Paulo i otohe i te horoaraa i te aˈoraa.

I teie mahana, te rave ra te mau Ite no Iehova i ta ratou ohipa “e faariro i te mau fenua atoa ei pǐpǐ, . . . ma te haapii atu ia ratou i te haapao i te mau mea atoa ta [Iesu Mesia] i parau atu.” A na reira ˈi ratou, eita teie mau Kerisetiano haavare ore e ofati i te mau parau mau bibilia o te faaite e o te faahapa i te haapiiraa hape e te haerea Kerisetiano ore. (Mataio 15:9; 23:9; 28:19, 20; Korinetia 1, 6:9, 10) Maoti i te riro mai ei enemi e patoihia mai, te faaite ra ratou i te anaanatae ei hoa mau.

Ma te paari faauruahia e te Atua, ua papai te fatu salamo e: “A papai mai te taata parau-tia ra ia ˈu, e mea hamani maitai ïa; e aˈo mai hoi oia ia ˈu ra, e riro ïa mai te monoˈi maitai ra, e ore tau upoo e paruparu i te reira.”—Salamo 141:5.