Te haapiiraa bibilia—No outou anei?

“EIAHA e taiohia aita anaˈe e perepitero.” Te itehia ra teie faaararaa i te omuaraa o te tahi mau Bibilia e fatuhia e te mau Katolika. “Ei Katolika, aita noa iho â matou i fanaˈo i te Bibilia,” ta Kay Murdy o te Catholic Bible Institute i Los Angeles ïa e parau ra, “te taui nei râ te tupuraa.” I te taaraa iho â i te mau Katolika nafea te mau Papai Moˈa e nehenehe ai e ohipa i nia i to ratou oraraa, te tapao ra oia e, “ua faaite ratou i to ratou hinaaro i te Bibilia.”

No nia i teie tauiraa, te faahiti ra te vea ra U.S. Catholic i te hoê tiaau haapiiraa i te pae faaroo o tei parau e te manaˈo ra te mau Katolika o tei apiti i roto i te mau pǔpǔ haapiiraa bibilia e “ei Katolika, mea fanaˈo ore ratou, e e rave rahi mau mea faufaa e vai ra i roto i te Bibilia. Te hinaaro ra ratou ia noaa mai te tahi o taua mau faufaa ra ta ratou i manaˈo e ua ere ratou.”

Noa ˈtu eaha te tupuraa, eaha te “mau mea faufaa” e vai ra e ite ai te hoê taata haapii bibilia? A hiˈo na: E hinaaro anei outou e ite nafea ia faaruru i te ahoaho o te oraraa o te mau mahana atoa? Nafea outou e nehenehe ai e tapea maite i te hau i roto i te utuafare? No te aha e rahi ai te huru haavî e te au ore i te taata? Eaha te tumu o te haavîraa uˈana i rotopu i te mau taurearea i teie mahana? E nehenehe e itehia te mau pahonoraa papu i teie e te tahi atu â mau uiraa maere i roto i te Parau a te Atua, te Bibilia, e e “mau mea faufaa” tera, oia mau, eiaha noa no te mau Katolika aore ra te mau Porotetani, oia atoa râ no te feia faaroo Bouddha, Hindou, Mahometa, Shinto, e te feia aita e tiaturi ra i te Atua e te mau agnostiques. Mai ta te taata papai salamo i faaite, ‘e lamepa te parau a te Atua no to ˈna avae, e e tiarama no to ˈna mau eˈa.’ E nehenehe e riro mai te reira atoa no outou.—Salamo 119:105.