Te faatia ra te feia poro i te Basileia

Ua mâha to ˈna mau hinaaro pae varua

E MOTU o Kupero e vai ra i te poro apatoerau hitia o te râ o te miti Mediteranea. I te tau bibilia, ua tui te roo o Kupero no ta ˈna veo e ta ˈna mau raau maitatai. Ua poro haere o Paulo raua o Baranaba i te parau apî maitai o te Basileia i reira i roto i to raua tere mitionare matamua. (Ohipa 13:4-12) I teie mahana, te ohipa maitai noa ra te parau apî maitai i nia i te oraraa o to Kupero e rave rahi. E parau mau iho â râ no Lucas, te hoê taata e 40 e tiahapa matahiti. Te faatia ra oia:

“Ua fanauhia vau i roto i te hoê utuafare e hitu tamarii i te hoê vahi faaamuraa animara. Mai te tamariiriiraa mai, mea au roa na ˈu e taio. O te hoê neneiraa faito nainai o te mau Papai Heleni Kerisetiano ta ˈu buka au roa ˈˈe. I te 10raa o to ˈu matahiti, ua haamau matou te tahi mau hoa i te hoê pǔpǔ haapiiraa bibilia iti. Aita râ te reira i vai maoro, no te mea ua parau te tahi mau taata paari o te oire e e feia hairesi matou.

“I muri aˈe, a haere ai au i te haapiiraa i te mau Hau Amui, ua farerei au i te taata e rave rahi mea ê ta ratou haapaoraa. Ua faatupu te reira i to ˈu hinaaro i te mau mea pae varua. Ua haere au e faahohonu i te mau haapaoraa taa ê i te vairaa buka a te fare haapiiraa tuatoru e rave rahi mahana i te maoro. Ua mataitai atoa vau tau fare pure, noa ˈtu râ ta ˈu mau tutavaraa, aitâ to ˈu mau hinaaro pae varua i mâha.

“I te otiraa ta ˈu tau haapiiraa, ua hoˈi au i Kupero e ua farii i te hoê ohipa ei faatere i te hoê piha maimiraa i te pae rapaauraa. Ua matau te hoê Ite no Iehova ruhiruhia o Antonis te iˈoa i te haere mai e hiˈo ia ˈu i ta ˈu vahi raveraa ohipa. Tera râ, ua ite te Ekalesia Orthodoxe Heleni i to ˈna mau tere farereiraa.

“Aita i maoro, ua haere mai te hoê taata maimi i te pae faaroo e parau ia ˈu eiaha e paraparau faahou i te mau Ite no Iehova. I te mea e ua haapiihia vau mai to ˈu tamariiraa mai e tei te Ekalesia Orthodoxe Heleni ra te parau mau, ua farii au i te reira, ua faaea i te tauaparau e o Antonis e ua haamata i te tauaparau no nia i te Bibilia e te taata maimi i te pae faaroo. Ua mataitai atoa vau i te mau fare monahi e rave rahi i Kupero. Ua reva atoa vau i te pae apatoerau o Heleni e ua mataitai i te mouˈa Athos, te mouˈa moˈa roa ˈˈe i roto i te ao Kerisetiano Orthodoxe. Tera râ, aitâ ta ˈu mau uiraa bibilia i pahonohia ˈtura.

“Ua pure atura vau i te Atua ia tauturu mai ia ˈu ia itea ia ˈu te parau mau. I muri iti noa ˈˈe, ua haere faahou mai o Antonis e farerei ia ˈu i ta ˈu vahi raveraa ohipa, e ua manaˈo vau e teie te pahonoraa i ta ˈu pure. No reira, ua faaea vau i te farerei i te taata maimi i te pae faaroo e ua haamata ˈtura i te haapii i te Bibilia e o Antonis. Ua tamau vau i te haere i mua, e i te avaˈe Atopa 1997, ua faataipe au i ta ˈu pûpûraa na Iehova na roto i te bapetizoraa i roto i te pape.

“I te omuaraa, ua patoi mai ta ˈu vahine e ta mâua na tamahine matahiapo e piti, 14 matahiti to te hoê e 10 to te tahi i taua taime ra. No to ˈu râ haerea maitai, ua faaoti aˈera ta ˈu vahine e haere i te hoê putuputuraa i te Piha a te Basileia. Ua maere roa oia i te maitai o te mau Ite e to ratou anaanatae mau. Ua maere iho â râ oia i ta ratou faaohiparaa i te Bibilia. I te pae hopea, ua farii ta ˈu vahine e ta mâua na tamahine matahiapo e piti e haapii i te Bibilia e te mau Ite no Iehova. A feruri na i to ˈu oaoa i te bapetizoraa ratou e toru i te Tairururaa Mataeinaa “Te parau tohu a te Atua” i te matahiti 1999!

“Oia, ua itea mai ia ˈu te parau mau. I teie nei, ua hoê to matou utuafare taatoa, tae noa ˈtu ta ˈu vahine e na tamarii e maha, i roto i te haamoriraa viivii ore a Iehova.”