Mau uiraa a te feia taio
Afea “tei Moˈa Rahi ra” i faatahinuhia ˈi, ia au i tei tohuhia i roto i te Daniela 9:24?
Te faahiti ra te parau tohu o te Daniela 9:24-27 i te faraa mai o “te Mesia te Arii”—o Iesu. Te faatahinuraa o “tei Moˈa Rahi ra” i tohuhia, e ere ïa te faatahinuraa i te vahi Moˈa Roa o te hiero i Ierusalema. E ere, te parau ra “tei Moˈa Rahi ra,” o te vahi moˈa ïa o te Atua i te raˈi—te vahi Moˈa Roa i nia i te raˈi—i roto i te hiero rahi pae varua o Iehova.a—Hebera 8:1-5; 9:2-10, 23.
Afea te hiero pae varua o te Atua i te ohiparaa mai? A hiˈo na eaha tei tupu i to Iesu haereraa ia bapetizohia oia i te matahiti 29 T.T. Mai taua taime mai ra o to ˈna oraraa to Iesu faatupuraa i te Salamo 40:6-8. I muri aˈe, ua faaite te aposetolo Paulo e ua pure Iesu i te Atua e: “Aita aˈenei i tia ia oe te tusia e te perosephora; ua faaau râ oe i te hoê tino no ˈu.” (Hebera 10:5) Ua ite Iesu e ‘aita i tia’ i te Atua ia pûpû-noa-hia te mau tusia animara i te hiero i Ierusalema. Ua faaineine maoti Iehova i te hoê tino taata tia roa no Iesu no te pûpû ei tusia. Ma te faaite i to ˈna hinaaro haavare ore, ua parau â Iesu e: “Teie au, e tau Atua, te haere nei au e faatia i to oe hinaaro, (ua papaihia te parau no ˈu i roto i te otaro o te buka ra).” (Hebera 10:7) E eaha te pahonoraa a Iehova? Te na ô ra te Evanelia a Mataio e: ‘E oti aˈera Iesu i te bapetizohia, haere maira oia i nia mai raro mai i te pape, e inaha, vetea aˈera te raˈi ia ˈna, hiˈo aˈera oia i te varua o te Atua i te pouraa mai mai te uupa ra, e te tauraa mai i nia iho ia ˈna: e inaha, o te reo maira no te raˈi mai, i te na ôraa mai e, Tau Tamaiti here teie, ua mauruuru roa vau ia ˈna.’—Mataio 3:16, 17.
Te faaite ra to te Atua ra o Iehova fariiraa i te pûpûraa Iesu i to ˈna tino ei tusia e ua faatiahia te hoê fata rahi aˈe i te fata iho i vai na i roto i te hiero i Ierusalema. E fata teie o te “hinaaro” o te Atua, aore ra ta ˈna faanahoraa no te farii i te ora taata o Iesu ei tusia. (Hebera 10:10) Te auraa o to Iesu faatahinuraahia i te varua moˈa, oia ïa ua rave te Atua i teie nei i ta ˈna faanahoraa o te hiero pae varua taatoa.b No reira, i te taime o te bapetizoraa o Iesu i faatahinuhia ˈi, aore ra i faataa-ê-hia ˈi, te nohoraa o te Atua i nia i te raˈi, mai “tei Moˈa Rahi ra” i roto i te faanahoraa o te hiero rahi pae varua.
[Nota i raro i te api]
a Ei faahohonuraa no nia i te mau tuhaa rau o te hiero pae varua o te Atua, a hiˈo i te mau api 14-19 o Te Pare Tiairaa o te 1 no Tiurai 1996.
b Te faahitihia ra te reira i te api 195 o te buka Prêtons attention à la prophétie de Daniel!
[Hohoˈa i te api 27]
Ua faatahinuhia “tei Moˈa Rahi ra” i to Iesu bapetizoraahia