Te “faaherehere” ra anei outou “i te taime maitai”?

UA AˈO te aposetolo Paulo i te mau Kerisetiano no Ephesia i te senekele matamua e: “E tena na, e ara ia tia to outou haerea, eiaha mai ta te [feia paari] ore ra, mai ta te feia [paari] râ, ma te faaherehere maite i te taime [maitai], no te mea e anotau ino teie.” (Ephesia 5:15, 16; MN) No te aha teie aˈoraa i riro ai ei mea faufaa? E titauhia te ite no nia i te mau huru tupuraa e farereihia ra e te mau Kerisetiano no taua oire i tahito ra no te pahono i teie uiraa.

Mea matauhia Ephesia no ta ˈna taoˈa rahi faahiahia, to ˈna morare ore rahi, ta ˈna ohipa ino i parare roa, e ta ˈna mau peu demoni rau. Hau atu â, i titauhia na i te mau Kerisetiano no reira ia patoi atu i te mau tiaturiraa philosophia no nia i te taime. Aita te mau Heleni e ere i te Kerisetiano no Ephesia e tiaturi ra e e mairi noa te taime i te hoê pae. Ua haapii te philosophia Heleni ia ratou e e haamata apî noa te oraraa ia au i te mau ohuraa hopea ore. E nehenehe ta te hoê taata tei haamâuˈa i to ˈna taime i roto i te hoê ohuraa o te ora, e fanaˈo faahou i te reira i roto i te tahi atu ohuraa. Ahiri i tia, ua nehenehe teie huru feruriraa e turai i te mau Kerisetiano no Ephesia ia pee i te hoê haerea haapao ore i te tapura tupuraa a Iehova, tae noa ˈtu i ta ˈna tapura haavaraa. No reira i tano roa ˈi te aˈoraa a Paulo e “faaherehere maite i te taime maitai.”

Aita Paulo e paraparau ra no nia i te auraa au noa o te taime. Te auraa o te taˈo Heleni ta ˈna i faaohipa e taime faataahia ïa, e anotau no te hoê opuaraa taa maitai. Te aˈo ra Paulo i te mau Kerisetiano no te senekele matamua ia faaohipa ma te paari i te taime maitai, aore ra anotau farii-maitai-raa, ta ratou e fanaˈo ra hou to ˈna hopearaa e tae mai ai e hou te aroha hamani maitai o te Atua e te pûpûraa i te ora e tatarahia ˈi.—Roma 13:11-13; Tesalonia 1, 5:6-11.

Te ora nei tatou i te hoê anotau maitai mai te reira. Maoti i te haamâuˈa i teie anotau farii-maitai-raa eita e horoa-faahou-hia, na roto i te tapiraa i te mau navenave taime poto e pûpûhia ra e teie nei ao, e haerea paari to te mau Kerisetiano ia faaohipa ratou i te taime e toe ra no te rave i te mau ohipa “haapao maitai e te paieti” a haapaari atu ai ïa i to ratou taairaa e te Atua Poiete ra o Iehova.—Petero 2, 3:11; Salamo 73:28; Philipi 1:10.