Te aroraa i te veve—E ore anei e manuïa?

E ITE te mau ratere e mataitai ra i te mau Nunaa Amui i te oire no New York, i te Piha apooraa o te faanavairaa faufaa e te ohipa totiare, e to ˈna mau tuio e mau faahororaa uira i nia i te aroaro fare i nia noa mai i te vahi haereraa taata. E faataa te vahine aratai e: “E hiˈo-pinepine-hia te aroaro fare ‘oti ore’ ei haamanaˈoraa taipe e e ore roa ˈtu te ohipa faanavairaa faufaa e totiare a te mau Nunaa Amui e oti; te vai noa ra iho â te tahi mea o te nehenehe e ravehia no te haamaitai i te huru oraraa o te taata o te ao nei.”

Noa ˈtu e ua faaoti papu te Apooraa e rave i te ohipa e au ia aruehia e faaitoito i te hoê faito oraraa teitei aˈe no te taatoaraa, e au ra e aita e hopea to te reira. Mea anaanatae ia tapao e i roto i te taviniraa a Iesu Mesia i te fenua nei i te senekele matamua T.T., ua parau oia e: ‘Tei nia iho ia ˈu te varua o Iehova, oia i faatahinu mai ia ˈu ei poro haere i te parau maitai i te taata rii.’ (Luka 4:18) Eaha te “parau maitai” ta ˈna i poro haere? O te poroi ïa o te Basileia ta te Atua ra o Iehova, te ‘paruru no te taata rii i roto i te ati,’ e haamau e o Iesu Mesia te Arii. Eaha ta taua Basileia ra e rave? Ua tohu o Isaia e: ‘Ei reira Iehova sabaota ra e rave ai, na te taata atoa i te oroa amuraa maa maitatai, i te oroa uaina tahito, i te mau mea maitatai roa ra, i te uaina tahito faaateate-maitai-hia ra. E na ˈna e haamou roa i te pohe e a muri noa ˈtu; e na te Fatu ra, na Iehova, e horoi i te roimata i te mau mata atoa ra.’—Isaia 25:4-6, 8.

E hinaaro anei outou e ite hau atu â nafea te Basileia o te Atua e ‘haamaitai ai i te huru oraraa o te taata o te ao nei,’ a ore roa ˈtu ai te veve? A hiˈo i raro nei no te ite eaha te rave ia haere atu te hoê orometua haapii aravihi i ǒ outou ra e faaite atu eaha ta te Bibilia e parau ra no nia i te reira.