‘Te hoê mea o te faaoaoa i te taata atoa’
I TUVALU, te hoê fenua nehenehe e iva motu i Patitifa Apatoa, te vai ra fatata 10 500 huiraatira. No te mea râ e ua ite ratou e ‘e hinaaro te Atua i te taata atoa ia ora, e ia noaa te ite i te parau mau,’ ua hinaaro te mau Ite no Iehova no reira i te mau papai Bibilia na roto i to ratou iho reo. (Timoteo 1, 2:4) Mea fifi roa te reira, no te mea aita e titionare na roto i to ratou reo. I te matahiti 1979, ua tamata te hoê mitionare a te mau Ite no Iehova e tavini ra i Tuvalu i te tatara i te fifi. Ua noho oia e ta ˈna vahine i ǒ te hoê utuafare no reira, ua haapii i te reo, e ua haamau mǎrû noa i te hoê titionare o te mau taˈo no Tuvalu. I te matahiti 1984, ua neneihia te buka E nehenehe oe e ora e a muri noa ˈtu i roto i te paradaiso i nia i te fenua nei na roto i te reo Tuvalu e te Watchtower Bible and Tract Society of New York, Inc.
Ua papai o Taote T. Puapua, te faatere hau nui tahito no Tuvalu, i te hoê rata e faaite ra i te mauruuru no te buka E ora e a muri noa ˈtu. Ua papai oia e: “Ua riro teie buka ei ohipa apî e te faufaa roa o te amuihia ˈtu i ‘te mau faufaa’ a Tuvalu. Eita e ore e te oaoa ra outou i te tuhaa ta outou i rave—e tuhaa maitai roa i roto i te paturaa i te oraraa pae varua o te mau taata o teie nunaa. Te tiaturi nei au e e papaihia teie ohipa i roto i te tuatapaparaa o Tuvalu no nia i te neneiraa i te mau buka haapiiraa. . . . Teie [ohipa], o te hoê ïa mea o te faaoaoa i te taata atoa.”
Maoti te tapura taˈo a te taata huri i matara mai ai te hoê titionare Tuvalu e Beretane i te matahiti 1993. Tera ïa te titionare matamua no te taata atoa na roto i taua reo ra. Aita i maoro aˈenei, ua ani te National Language Board no Tuvalu i te parau faatia e faaohipa i te reira no te haamau i ta ratou titionare matamua na roto i to ratou reo.
Mai te 1 no Tenuare 1989 mai â, te neneihia ra te hoê numera taavaˈe o Te Pare Tiairaa na roto i te reo Tuvalu. Mai te peu e te taio nei outou i teie nei vea na roto i te piti o to outou reo, no te aha e ore ai e hiˈo i te api 2 aita anei e vai ra to outou reo tumu i rotopu i te mau reo i neneihia ˈi Te Pare Tiairaa? Aita e feaaraa, e oaoa ˈtu â outou i te taio atu na roto i to outou reo tumu.