Auhoêraa i te pae haapaoraa i mua nei?
“Te ite nei matou i te hoê mahana faufaa i roto i te tuatapaparaa o ta matou mau ekalesia,” ta Christian Krause ïa, peretiteni o te taatiraa a Luther na te ao atoa, i parau. Oia atoa, ua parau te pâpa Ioane Paulo II no nia i “te hoê tupuraa faufaa i nia i te eˈa fifi no te patu-faahou-raa i te auhoêraa hope i rotopu i te mau Kerisetiano.”
Ua haapurorohia teie mau parau anaanatae no te mea ua tarimahia te hoê irava matauhia a te Hau i te 31 no Atopa 1999, i Augsbourg, i Helemani, o te haapapu ra i te faaiteraa amui o te haapiiraa tumu o te faatiaraa. Ua maiti-maitai-hia te hora e te vahi o te reira ohipa. Te parauhia ra e i te 31 no Atopa 1517, ua patǐtǐ o Martin Luther i to ˈna na 95 manaˈo tumu i nia i te opani o te fare pure i Wittenberg, o tei faatupu ïa i te Reforomatio Porotetani. Oia mau, i Augsbourg to te mau pǐpǐ a Luther faaiteraa i ta ratou tiaturiraa tumu, te irava no Augsbourg, i te matahiti 1530, o tei patoihia e te Ekalesia Katolika, a faatupu atu ai i te aimârôraa afaro ore i rotopu i na haapaoraa Porotetani e Katolika.
E riro anei te faaiteraa amui ei ravea papu no te faaafaro i te amahamaharaa o te ekalesia, mai tei parauhia? E ere o te mau pae atoa te tiaturi ra i te reira. Ua hau atu i te 250 Porotetani maimi i te pae faaroo o tei tarima i te hoê parau patoi, o te faaara ra no nia i te mea e e na nia ˈˈe te Ekalesia Katolika. Ua riri atoa te mau Porotetani i to te Ekalesia Katolika faaite-haere-raa i te hoê faaoreraa utua taa ê no te matahiti 2000, te reira iho te ohipa o tei faatupu oioi i te aimârôraa fatata a 500 matahiti aˈenei. E i te mea e te mana noa râ te irava no Augsbourg e te patoiraa Katolika na roto i te Apooraa no Trente e ere ïa te auhoêraa i te mea papu roa.
No te mea e ua rahi roa te amahamaharaa e te aimârôraa i roto i te Amuiraa faaroo Kerisetiano, eita ïa e noaa i te tarimaraa i te hoê noa ˈˈe faaiteraa amui i te faatitiaifaro atu. Hau atu â, ua taaihia te auhoêraa i roto i te faaroo i nia i te mau tiaturiraa tei niu-papu-hia i nia i te Parau a te Atua, te Bibilia. (Ephesia 4:3-6) Eita te auhoêraa mau e tupu na roto i te taivaraa, na roto râ i te haapiiraa e te raveraa i ta te Atua e titau ra ia tatou. “E haere noa te mau taata ěê atoa ma te iˈoa anaˈe o to ˈna iho atua,” ta te peropheta haapao maitai ïa o Mika i parau, “e haere râ tatou ma te iˈoa o Iehova, o to tatou ïa Atua e a muri noa ˈtu.”—Mika 4:5.
[Faaiteraa i te fatu o te hohoˈa i te api 32]
© Ralph Orlowski/REUTERS/Archive Photos