E faufaa maoro to te haviti o roto mai

“E FAAAIFAITO TE MAU TAUREAREA TANE I TE HAVITI E TE MAITAI MORARE,” TA TE HOÊ ÏA KERISETIANO PAARI HAAPAO MAITAI I TAPAO.

Oia, mea maoro to te taata haafaahiahiaraa ma te tano ore i te haviti o rapaeau, o te pinepine ïa i te faahape i te manaˈo i te mau huru maitai o roto mai. Area to tatou Atua Poiete ra, e hiˈo ïa eaha to tatou huru i roto roa mai, noa ˈtu eaha to tatou huru rapaeau. Mea na reira to ˈna horoaraa i te hiˈoraa maitai roa ˈˈe o te manaˈo paari. Ia au i te Bibilia, te na ô ra te Atua iho e: “E ore hoi ta Iehova hiˈoraa e au i ta te taata; e hiˈo hoi te taata i te huru i rapae au aˈe, area o Iehova, e hiˈo ïa i te aau.”—Samuela 1, 16:7.

O te Atua te Tumu o te haviti mau o te taata, e te faaite ra ta ˈna Parau e ia faito oia i te huru maitai mau o te hoê taata, o te mau huru maitatai pae varua te mea faufaa roa ˈˈe. Te na ô ra te Bibilia e: “E mure â te nehenehe, e te purotu e mou ïa, o te vahine râ e mǎtaˈu ia Iehova ra, e haamaitai-rahi-hia ïa.” (Maseli 31:30) Oia mau, e nehenehe te purotu rapaeau e huna i te hairiiri o roto mai. (Esetera 1:10-12; Maseli 11:22) Noa ˈtu e e maheahea ˈtu te haviti o te tino i te roaraa o te tau, e nehenehe te haviti o roto mai—te mau huru maitatai o te aau—e tupu i te rahi e e vai maoro.

E haerea paari mau ïa te faahoturaa i te mau huru maitatai mai te here, te oaoa, te hau, te faaoromai, te mǎrû, te maitai, te faaroo, te mamahu, e te hitahita ore! (Galatia 5:22, 23) E noaa ïa ia tatou te haviti o roto mai, e faufaa maoro mau hoi to te reira.—Petero 1, 3:3, 4.