“Te hoê hiˈoraa o te tahoêraa”

O TE upoo parau tera o te hoê tumu parau i neneihia i roto i te hoê vea i Indaiatuba, i São Paulo, i Beresilia. Na vai i horoa i te hiˈoraa? “Te horoa ra te mau Ite no Iehova, tei opua e patu i te hoê ‘Piha a te Basileia’ apî, mai ta ratou e parau i ta ratou mau hiero aore ra piha oreroraa, i te hoê hiˈoraa maitai e te ite-mata-hia no nia i te autahoêraa eita e nehenehe e tapo i te mata i mua,” ta te taata papai ïa i faataa.

E ite-maitai-hia te tahoêraa o te mau Ite no Iehova i roto i taua mau tupuraa ra. No reira te tumu parau i faataa ˈi e: “Mea putapû roa ia ite atu i te mau rima tauturu tane, vahine, e taurearea ia rave amui ma te aau tae i roto i te paturaa i te hoê fare i reira ratou e haaputuputu e e haamori ai i te Atua.”

E faaite atoa te mau Ite no Iehova i te hiˈoraa maitai i roto i te tahi atu mau tuhaa. “Hau atu i te haapiiraa e te pureraa, ta ratou fa, te haatura-faahou-raa ïa i te feia i matau i te ava e te raau taero e te faaiteraa i te taata i te eˈa o te tururaa te tahi i te tahi e te here,” o ta te tumu parau ïa i parau faahou. Nafea ratou e rave ai i te reira? Ua ite te mau Ite e e tauturu te haapiiraa e te faaohiparaa i te mau aˈoraa Bibilia i te hoê taata ia tiamâ mai oia i te mau peu hairiiri. No reira ratou e tutava ˈi i te haapii atu ia vetahi ê i ta ratou i haapii mai i roto i te Bibilia. Ua faaoti te tumu parau ma te na ô e o to ratou “te hiˈoraa o te tia ia peehia ma te ru, aita e feaaraa.”

E fariihia te taata atoa i roto i te mau putuputuraa a te mau Ite no Iehova e eita e titauhia te moni. Te titau-manihini-hia ˈtu nei outou e haere atu i te hoê Piha a te Basileia i pihai i to outou fare.