Te paari no ǒ mai i te Atua ra—Nafea te reira e faaohipahia ˈi?

“TE PAARI . . . o te taata haehaa ra, e vahavahahia ïa, e aore e haapao-rea-hia ta ˈna parau.” Tera ta te arii paari ra o Solomona i papai ei faahopearaa i te aamu o te hoê taata haehaa e te paari râ o tei faaora i te hoê oire taatoa i te haamouraa. Te vahi peapea râ hoi, “aore . . . e taata i manaˈo i taua taata iti haehaa ra.”—Koheleta 9:14-16.

Mea au na te taata e hiˈo ino i te feia mea iti ta ratou faufaa, noa ˈtu e e mau ohipa maitatai ta teie mau taata veve i rave. O te ohipa ïa i tupu i nia ia Iesu. Ua tohu o Isaia no nia ia ˈna e: “I vahavahahia oia, e aore i haapaohia e te taata; e taata mataro i te oto, e ua ite hoi i te mihi.” (Isaia 53:3) Ua hiˈo ino vetahi ia Iesu no te mea noa e aita to ˈna e tiaraa aore ra e parahiraa teitei mai to te feia aratai o to ˈna ra tau. Teie râ, ua fanaˈo oia i te paari o tei hau aˈe i to te mau taata hara. Aita te mau taata o te oire tumu o Iesu i farii e ua faaohipa teie “tamaiti a te tamuta” i taua paari ra e ua faatupu i te mau semeio rahi mau. E hape rahi mau râ tera, no te mea te na ô ra te faatiaraa i muri iho e “aita [Iesu] i rave rea i te semeio i reira, no to ratou faaroo ore.” E ereraa rahi mau tera no taua mau taata ra!—Mataio 13:54-58.

Ia ore tatou e hape mai te reira. “E faatiahia . . . te paari e ta ˈna ra mau [ohipa],” o ta Iesu ïa i parau. E itehia te feia e rave ra i te ohipa a te Atua e e faaite ra i te paari no te raˈi mai, eiaha na nia i to ratou tiaraa aore ra pǔpǔ totiale, na nia râ i ta ratou ‘faahoturaa i te huero maitai’—to ratou faaroo e ta ratou mau ohipa niuhia i nia i te Bibilia.—Mataio 7:18-20; 11:19; MN.