E faahanahana te mau ohipa maitatai i te Atua
TE TUTAVA nei te feia e here ra i te Atua i te faahohoˈa i te maramarama i te pae varua o ta ˈna Parau, te Bibilia. Mea na reira ïa ratou e pee ai i te faaueraa a Iesu e: “To outou maramarama, ia anaana ïa i mua i te aro o te taata nei, ia hiˈo ratou i ta outou parau maitai, e ia haamaitai i to outou Metua i te ao ra.” (Mataio 5:16) E nehenehe te parau e te haerea maitai e faahanahana i te Atua.
Te imi nei te mau Ite no Iehova i te faaoaoa i te Atua ma te ohipa ia au i te Bibilia e ma te tutava i te tauturu ia vetahi ê i te pae varua. Te na reira ra ratou i roto atoa i te mau fenua aita ta ratou taviniraa i te vahi taata i haamanahia ˈtura. I te oire pu o te hoê o taua mau fenua ra, te faatupu ra te mau Ite i te mau tairururaa matahiti o tei haaputuputu e 6 000 e tae atu i te 9 000 taata. No taua mau tairururaa ra, ua tarahu ratou i te tahi mau piha o te hoê fare rahi roa i reira te mau faaiteiteraa tauihaa e faatupuhia ˈi. Mai ta ratou i rave na i te mau matahiti i mairi aˈenei, na mua ˈˈe i ta ratou tairururaa i te matahiti 1999, e mau hanere Ite o tei rohi no te tamâ i te mau vahi e o tei faanaho i te haapurororaa e te mau tausani parahiraa.
Aita i ore e ua itehia teie faaineineraa taatoa. Ua hiˈo te pǔpǔ feia faatere i te fare rahi roa i taua mau ohipa ra. Ua ite atoa ratou e, noa ˈtu e ua tae mai te hoê faito roa ˈˈe 15 666 taata, mea tere maite te mau mea atoa e mea nahonaho roa te mau Ite. Ua maere atoa te pǔpǔ rave ohipa i te tamâ-maitai-roa-raa i ravehia i muri aˈe.
Ua faaite te feia faatere i to ratou mauruuru no teie mau mea atoa ma te tuu i te mau Ite i roto i te feia tarahu matamua, na ratou ïa na mua e tarahu i te piha i te matahiti i mua nei. Aita râ te feia faatere i faaea noa i reira. I te 15 no Tiurai 1999, ua pûpû ratou i te hoê re haamauruururaa i te tomite o te tairururaa. Teie te parau i papaihia i nia i te iri, “te amuiraa a te mau Ite no Iehova”—te hoê mea manaˈo-ore-hia i roto i te hoê fenua aita ta ratou ohipa haapiiraa Bibilia i tiamâ roa.
I te matahiti 2000/2001, e mau mirioni taata o te tiaihia ra i te mau hanere tairururaa mataeinaa a te mau Ite no Iehova te “Feia rave i te Parau a te Atua” e ati aˈe te ao nei. Ia tae mai outou, e nehenehe ïa outou iho e hiˈo nafea te feia o te rave maitai ra i ta te Bibilia e parau ra e apiti ai i roto i te mau ohipa maitatai o te faahanahana i te Atua.