No te aha e faaore ai i te hara?
“UA RAVE te mau aivanaa i te tahi maimiraa o tei haamata i te haapapu e e nehenehe te faaoreraa i te hara e haamaitai i te ea i te pae feruriraa—e, oia atoa paha i te pae tino,” o ta The Toronto Star no Kanada ïa e faataa ra. Teie râ, te tapao ra o Carl Thoresen, orometua haapii no te Fare haapiiraa tuatoru no Stanford i te mau Hau Amui, e taata maimi rahi no te Stanford Forgiveness Project (ohipa maimiraa no nia i te faaoreraa i te hara), e “mea iti roa te taata ua taa ia ratou eaha te faaoreraa i te hara e nafea te reira e ohipa ˈi.”
Ua riro te faaore-mau-raa i te hara ei tuhaa faufaa o te Kerisetianoraa. Te tatara ra te parau faataa a te Toronto Star i te reira mai “te fariiraa e ua hara te hoê taata ia outou, te haapaeraa i te inoino atoa ta te reira e faatupu, e i te pae hopea te faahoˈiraa i te aroha e tae noa ˈtu i te here i te taata i hara.” E tia ia faataa-ê-hia te reira i te taporaa i te mata i nia i te hoê hara, te faatiaraa, te tâuˈa-ore-raa, aore ra te hunaraa i te reira; e ere te reira te auraa e ia vaiiho noa outou ia hamani-ino-hiâ outou. Te na ô ra te parau faataa e te ravea no te faaore-mau-raa i te hara, o te “faarueraa ïa i te iria e te mau manaˈo iino.”
Te na ô ra te feia maimi e mea hinaarohia ia hiˈopoa-hau-hia ˈtu â te mau maitai pae tino o te faaoreraa i te hara. Teie râ, te faataa ra ratou i te tahi mau maitai i te pae feruriraa, mai “te faaitiraa i te faateimaharaa, te haapeapearaa e te hepohepo.”
I roto i te Ephesia 4:32, te horoahia ra te hoê tumu maitai roa e tia ˈi ia faaore i te hara: “Ia hamani maitai outou ia outou iho, ma te aau mǎrû aroha noa, ma te faaore hoi i te hara te tahi e te tahi, mai ta te Atua i faaore mai i ta outou i te Mesia ra.” No nia i te faaoreraa i te hara, mai te tahi atu mau mea, te faaitoitohia ra tatou ia riro ei feia e pee ra i te Atua.—Ephesia 5:1.
E nehenehe te oreraa e faaore i ta vetahi ê ra hara a vai ai te hoê tumu no te aroha e faaino roa i to tatou mau taairaa e te Atua. Te hinaaro ra Iehova ia faaore tatou i ta vetahi ê hara. I reira ïa tatou e nehenehe ai e pure ia faaore mai oia i ta tatou hapa.—Mataio 6:14; Mareko 11:25; Ioane 1, 4:11.