Na vai e faaore i te haavîraa uˈana?

I TE avaˈe Setepa 1999, ua farii te Papai parau Rahi o te mau Nunaa Amui ra o Kofi Annan i te mau tia i te 54raa o te rururaa matahiti a te Apooraa Rahi. Ia au i te vea ra The Toronto Star, ua tuu oia i te hoê tautooraa i mua i te mau faatere o te ao nei ma te parau e: “Te vai ra e rave rahi mau taata o te hinaaro hau atu i te mau parau aroha noa a te amuiraa taata no te mau nunaa atoa. Te hinaaro nei ratou i te hoê parau faaau mau e te papu e faaore i te faaohuraa o te haavîraa uˈana, e e tuu ia ratou i nia i te eˈa papu o te aratai i te ruperuperaa.”

E nehenehe anei te mau Nunaa Amui e to ˈna mau hau melo e horoa i te “parau faaau mau e te papu” e hinaarohia no te faaore i te haavîraa uˈana? I roto i tauâ parau faataa ra Star, ua na ô te Peretiteni o te mau Hau Amui ra o Bill Clinton e: “I muri aˈe i te mau haamaniiraa toto atoa o teie senekele, ua ite tatou e mea ohie ia parau ‘eiaha faahou,’ mea fifi roa râ ia na reira mau.” Ua na ô faahou oia e: “E nehenehe te tǎpǔ-rahi-roa-raa e riro ei hoê â inoraa e te oreraa e tauˈa rahi atu.”

Hau atu i te 2 500 matahiti aˈenei, ua na ô te peropheta ra o Ieremia no nia i te mau tutavaraa taata nei e: “Ua ite hoi au, e Iehova, e ere tei te taata iho to ˈna haerea; e ere hoi tei taua taata e haere ra i te haapao i to ˈna taahiraa.” (Ieremia 10:23) Eaha ˈtura ïa te tiaturiraa e e faaorehia te haavîraa uˈana?

Ia au i te Isaia 60:18, te haapapu ra te Atua e: “E ore te hamani ino e itea-faahou-hia i to oe ra fenua; e te pohe, e te ati, i roto i to oe ra mau otia.” Ua tupu na mua taua parau tohu ra i to te Atua faahoˈiraa i to ˈna nunaa faatîtîhia i to ratou fenua aiˈa. E tupuraa rahi atoa to te reira ta tatou e nehenehe e fanaˈo. Aita te Atua ra o Iehova e ‘tǎpǔ rahi roa’ ra. Ei Atua Teitei roa ˈˈe tei poiete i te huitaata, mea tano maitai roa e na ˈna e faaore i te “faaohuraa o te haavîraa uˈana.” E tupu te hau i raro aˈe i te Basileia o te Atua. E ore te haavîraa uˈana e a muri noa ˈtu!—Daniela 2:44.