Te tapearaa i te taiva ore ia Iehova

TE TAIVA ore, noa ˈtu e mea varavara roa i teie mahana, e huru maitai ïa e itehia ra i nia i te mau tavini o te Atua mau ra o Iehova. E mau papu noa te hoê taata taiva ore noa ˈtu te mau tamataraa e eita oia e aueue a mairi noa ˈi te tau. A hiˈo na i te arii maitai ra o Hezekia. “Aore hoi o ˈna e faito i muri aˈe ia ˈna, i te mau arii atoa o Iuda ra, aita hoi o ˈna e faito i mua ia ˈna ra,” o ta te Bibilia ïa e parau ra. Na te aha i faataa ê ia Hezekia? “Ua ati maite oia ia Iehova,” noa ˈtu e ua haaatihia oia e te feia haamori i te atua hape ra o Moloha. Oia, aita Hezekia “i faarue i te pee ia [Iehova], ua haapao râ oia i ta ˈna parau.”—Te mau arii 2, 18:1-9.

Te tahi atu taata o tei tapea i te taiva ore ia Iehova, o te aposetolo Paulo ïa. Te haapapu ra te mau faatiaraa o ta ˈna taviniraa e itehia i roto i te mau Papai Heleni Kerisetiano ma te faahiahia e ua tavini tamau Paulo i te Atua ma te nephe atoa. I te taime hopea o to ˈna oraraa i nia i te fenua, ua nehenehe Paulo e parau no ˈna iho e: “I [aro] na vau i te [aroraa] maitai, ua oti t[a] ˈu hororaa, i mau maite na vau i te [faaroo].”—Timoteo 2, 4:7; MN.

E mau hiˈoraa maitai no te taiva ore o Hezekia e o Paulo no tatou! Ia pee ïa tatou i to raua faaroo ma te tapea i te taiva ore i to tatou Atua rahi ra o Iehova.—Hebera 13:7.