Te hoê taime taa ê—E tae mai anei outou?

I TE hoê mahana faahiahia roa hau atu i te 3 500 matahiti i teie nei, ua faaue te Atua ra o Iehova ia taparahi te mau utuafare ati Iseraela taitahi i faatîtîhia i Aiphiti i te hoê arenio aore ra te hoê puaaniho e ia pîpî i to ˈna toto i nia i te mau pou e te mau tea uputa o to ratou mau fare. I taua iho â po ra, ua haere te melahi a te Atua na nia i te mau fare tei tapaohia ma te haapohe râ i te mau tamaroa matahiapo i roto i te mau fare a to Aiphiti atoa. Ua tiamâ ihora te mau ati Iseraela. Ei faahaamanaˈoraa i taua tupuraa ra, ua faatupu te mau ati Iuda i te oroa Pasa.

I muri mai iho i to Iesu Mesia faaotiraa i te faatupu i ta ˈna oroa Pasa hopea e ta ˈna mau aposetolo, ua haamau oia i te hoê amuraa maa no te haamanaˈo i to ˈna iho pohe tusia. Ua horoa oia i te pane faahopue-ore-hia i ta ˈna mau aposetolo ma te parau e: “A rave, a amu; o tau tino teie.” I muri iho, ua tuu atura oia i te hoê auˈa uaina ia ratou ma te parau e: “A inu outou atoa; o to ˈu ïa toto, e toto no te faufaa apî, i haamaniihia no te taata e rave rahi ia matara te hara.” Ua parau atoa Iesu e: “E na reira outou ei manaˈoraa ia ˈu.” (Mataio 26:26-28; Luka 22:19, 20) No reira, ua faaue Iesu ia haamanaˈo ta ˈna mau pǐpǐ i to ˈna pohe.

I teie matahiti, e topa te mahana poheraa o Iesu i te Mahana toru 19 no Eperera i muri aˈe i te toparaa mahana. E putuputu te mau Ite no Iehova e ati aˈe te ao nei i taua po taa ê ra no te haapao i teie oroa Haamanaˈoraa mai ta Iesu i ani. Te titau-manihini-hia ra ia amui mai outou ia matou ei feia haapao. A ani ïa i te mau Ite no Iehova no to outou vahi eaha mau na te hora e te vahi o te putuputuraa.