Te faatia ra te feia poro i te Basileia

“Ua ite rahi oe i te Bibilia”

I TE 12raa o to ˈna matahiti, ua tauaparau Iesu ma te itoito i te mau tia faaroo i Ierusalema, “maere anaˈe ihora te feia atoa i faaroo ia ˈna ra, i to ˈna ite e ta ˈna parau.” (Luka 2:47) I teie mahana atoa, te faaitoito nei e rave rahi tavini apî o Iehova i te tauaparau i ta ratou mau orometua haapii e to ratou mau hoa haapiiraa no nia i te Atua e te Bibilia, e e pinepine ratou i te ooti i te mau faahopearaa faahiahia mau.

Tei roto o Tiffany, 14 matahiti to ˈna, i te hoê piha haapiiraa o tei tauaparau roa i nia i te parau tohu Bibilia o na hebedoma matahiti e 70 ra e itehia i roto i te Daniela 9:24-27. Ua horoa te orometua haapii i te tahi mau tupuraa no nia i te mau irava e ua tatara oioi i te tumu parau ma te ore e faahohonu.

I te omuaraa, ua feaa o Tiffany i te amo i to ˈna rima i nia. “No te tahi râ mau tumu,” ta ˈna ïa e parau ra, “ua peapea mau â vau e aita te mau irava i faataa-roa-hia. E hou vau a ite ai i te reira, tei nia aˈena ta ˈu rima.” I te mea e te fifi ra te rahiraa o te mau tamarii haapii no te papu i te reira, ua maere te orometua haapii i te mea e e manaˈo iho â to te hoê tamarii no nia i te tumu parau.

Ma te fanaˈo i te taime no te faataa i te parau tohu, ua tia e ua tauaparau o Tiffany ma te faaineine-ore-hia. I to ˈna faaotiraa, aita roa ˈtu e maniania i roto i te piha. Ua taiâ rii o Tiffany. I muri iho, ua haapoupou te piha ma te faaea ore.

“Mea faahiahia roa te reira, Tiffany, mea faahiahia roa,” o ta te orometua haapii ïa i parau e rave rahi taime. Ua faˈi oia e ua ite oia e te vai mau ra hau atu â i taua mau irava ra, o Tiffany râ te tamahine matamua i faataa maitai i te reira ia ˈna. I to te piha faaotiraa, ua ani oia ia Tiffany mea nafea to ˈna ite-rahi-raa i te Bibilia.

“No te mea e Ite no Iehova vau,” o ta ˈna ïa i pahono. “E rave rahi taime to to ˈu mau metua faataaraa mai ia ˈu i taua parau tohu ra hou vau a papu ai.”

Ua maere atoa te mau hoa haapiiraa i to ˈna ite i te Bibilia. Ua parau te hoê tamahine haapii ia Tiffany e: “I teie nei, ua ite au no te aha outou, te mau Ite no Iehova, e haere ai i tera e tera uputa; no to outou ite rahi i te Bibilia.” Ua tǎpǔ vetahi e eita ratou e haafifi faahou ia ˈna no nia i ta ˈna mau tiaturiraa.

I to Tiffany faaiteraa i te ohipa i tupu i to ˈna mau metua, ua parau raua e mea maitai ia pûpû oia i te buka ra Te ite e aratai i te ora mure ore i ta ˈna orometua haapii. I to ˈna na reiraraa e faaiteraa i te tuhaa e faataa ra i te parau tohu a Daniela i ta ˈna orometua haapii, ua farii oioi oia i te buka e ua haamauruuru ia ˈna no te reira.

Parau mau, ia faaitoito te mau Kerisetiano apî i te tauaparau no nia i te Atua e te Bibilia ia au i ta to ratou mau metua i haapii atu ia ratou, te arue e te faahanahana ra ïa ratou ia Iehova o tei haamaitai ia ratou.—Mataio 21:15, 16.